Erteń jańa oblystardan Senat saılaýyna kandıdattar usynyla bastaıdy
Otyrys barysynda saılaýǵa daıyndyq jáne ony ótkizý jónindegi negizgi is-sharalardyń kúntizbelik josparyn bekitý, saılaý qujattarynyń keıbir nysandaryn bekitý, depýtattyqqa kandıdattyń respýblıkalyq bıýdjet qarajatynan jabylatyn shyǵystarynyń mólsherlerin belgileý máseleleri qaraldy.
OSK tóraǵasy Nurlan Ábdirov atap ótkendeı, Konstıtýtsııaǵa sáıkes Senatta ár oblystan, respýblıkalyq mańyzy bar qaladan jáne astanadan eki adamnan ókildik etetin depýtattar bolýy kerek.
Senat depýtattaryn janama saılaý quqyǵy negizinde jasyryn daýys berý arqyly máslıhattar depýtattary saılaıdy.
Parlament Senaty depýtattarynyń saılaýyn uıymdastyrý men ótkizýdi Ortalyq saılaý komıssııasy basqarady, óńirlerde tıisti aýmaqtyq saılaý komıssııalary qamtamasyz etedi.
Ortsaılaýkom tóraǵasynyń orynbasary Konstantın Petrovtyń baıandaýynsha, úsh oblystyń árqaısysynan 2 depýtat saılanady: olardyń bireýi – 2017 jylǵy 28 maýsymda saılanǵan depýtattardyń ókilettik merzimine, ekinshisi – 2020 jylǵy 12 tamyzda saılanǵan depýtattardyń ókilettik merzimine saılanady.
Konstıtýtsııaǵa sáıkes, 30 jasqa tolǵan, el aýmaǵynda keıingi 10 jylda jáne tıisti oblys aýmaǵynda keminde 3 jyl turaqty turyp jatqan Qazaqstan Respýblıkasynyń azamaty Parlament Senatynyń depýtaty bola alady. Sonymen qatar, úmitkerdiń joǵary bilimi men keminde 5 jyl jumys ótili bolýy kerek.
Sot áreketke qabiletsiz dep tanyǵan azamattardyń saılaýǵa jáne saılanýǵa quqyǵy joq.
Sottylyǵy zańda belgilengen tártippen ótelmegen nemese alynbaǵan adam, sondaı-aq zańda belgilengen tártippen sybaılas jemqorlyq qylmys jáne sybaılas jemqorlyq quqyq buzýshylyq jasaýda kinásin sot tanyǵan adam Qazaqstan Respýblıkasy Parlamenti Senatynyń depýtattyǵyna kandıdat bola almaıdy.
Sonymen, bekitilgen kúntizbelik josparǵa sáıkes saılaý naýqanynyń kelesi kezeńderi anyqtaldy:
- Kandıdattardy usyný – 13 shildeden 30 shilde saǵat 18:00-ge deıin.
Qazaqstan Respýblıkasy Parlamenti Senatynyń depýtattyǵyna kandıdatty usynýdy máslıhattar, sondaı-aq ózin-ózi usyný tártibimen júzege asyrady. Senat depýtattyǵyna kandıdat oblys máslıhattarynyń ókilderi bolyp tabylatyn tańdaýshylardyń jalpy sanynyń keminde 10%-niń qoldaýyna, biraq bir máslıhattan tańdaýshylar daýysynyń 25%-inen aspaıtyn daýsyna ıe bolýǵa tıis.
Parlament Senatynyń depýtattyǵyna kandıdattyń Qazaqstan Respýblıkasynyń Konstıtýtsııasynda jáne saılaý týraly Konstıtýtsııalyq zańda qoıylatyn talaptarǵa sáıkestigin anyqtaýdy oblystyń saılaý komıssııasy qajetti qujattardy alǵannan keıin úsh kún ishinde júzege asyrady.
- Tirkeý – 3 tamyz saǵat 18:00-ge deıin.
QR Parlamenti Senatynyń depýtattyǵyna kandıdattardy tirkeýdi oblystyq, qalalyq nemese aýdandyq máslıhattyń depýtattyqqa kandıdat etip usyný týraly sheshimi (máslıhat usynǵan jaǵdaıda); depýtattyqqa kandıdat bolyp daýysqa túsýge kelisimi (nıeti) týraly ótinishi; tıisti saılaý komıssııasynyń kandıdatty qoldap qoıǵan tańdaýshylardyń qoldaryn tekserý nátıjeleri týraly hattamasy; kandıdattyń ómirbaıandyq derekteri; kandıdattyń jáne onyń jubaıynyń (zaıybynyń) aktıvteri men mindettemeleri týraly deklaratsııalar tapsyrǵany týraly memlekettik kiris organynyń anyqtamasy; kandıdattyń 900 000 teńge kólemindegi saılaý jarnasyn engizgenin kýálandyratyn qujat bolǵan kezde oblystyq saılaý komıssııalary júzege asyrady.
Eger saılaý qorytyndylary boıynsha kandıdat Parlament Senatynyń depýtaty bolyp saılanǵan nemese daýys berý qorytyndylary boıynsha kandıdat daýys berýge qatysqan tańdaýshylar daýsynyń keminde 5 paıyzyn alǵan jaǵdaılarda, sondaı-aq kandıdat qaıtys bolǵan jaǵdaıda engizilgen jarna kandıdatqa qaıtarylady. Qalǵan barlyq jaǵdaılarda engizilgen jarna qaıtarylýǵa jatpaıdy jáne respýblıkalyq bıýdjet kirisine alynady.
- Saılaý aldyndaǵy úgit – 3 tamyz saǵat 18:00-den bastap 23 tamyz saǵat 00:00-ge deıin.
- Tynyshtyq kúni – 23 tamyz.
- Daýys berý kúni – 24 tamyz.
Senat depýtaty saılaýyndaǵy daýystardy sanaý nátıjeleri daýys berýge arnalǵan pýnkte ótkiziletin tıisti saılaý komıssııasynyń otyrysynda belgilenedi.
Senat depýtatyn saılaý boıynsha daýystardy sanaý hattamasy tańdaýshylardyń birlesken otyrysynda jarııa etiledi jáne saılaý kúninen bastap 2 kúnnen aspaıtyn merzimde, ıaǵnı 25 tamyzda Ortsaılaýkomǵa jiberiledi.
Parlament Senaty depýtattaryn saılaý qorytyndylaryn Ortsaılaýkom saılaý ótkizilgen kúnnen bastap 7 kún merzimnen keshiktirmeı belgileıdi.
Jańa oblystarda «QR Parlamenti Senatynyń depýtattaryn saılaý jónindegi saılaý qujattarynyń keıbir nysandaryn bekitý týraly» qaýly jobasyn OSK músheleri biraýyzdan qabyldady.
Qaýlymen saılaý qujattarynyń mynadaı nysandary bekitildi:
1) Qazaqstan Respýblıkasy Parlamenti Senatynyń depýtattaryn saılaý boıynsha daýys berýge arnalǵan bıýlleten;
2) Respýblıka Parlamenti Senatynyń depýtattaryn saılaý jónindegi daýystardy sanaý nátıjeleri týraly saılaý komıssııasynyń hattamasy;
3) Qazaqstan Respýblıkasy Parlamenti Senaty depýtattarynyń saılaýynda daýystardy sanaý nátıjeleri týraly habarlama.
Sondaı-aq, «QR Parlamenti Senatynyń depýtattyǵyna kandıdattyń respýblıkalyq bıýdjet qarajatynan jabylatyn shyǵystarynyń mólsherlerin belgileý týraly» qaýly qabyldandy.
Qaýly boıynsha kandıdattyń teledıdar men radıo efırlerinde sóz sóıleýine, sondaı-aq merzimdi baspa basylymdarynda 2 maqala jarııalaýyna – 350 000 teńge somasynda; saılaý aldyndaǵy jarııa is-sharalardy ótkizýge jáne úgit materıaldaryn shyǵarýǵa – 70 000 teńge somasynda; kólik shyǵystaryna – 80 000 teńge somasynda shyǵystar mólsheri belgilengen.
Eske salsaq, buǵan deıin Prezıdent Abaı, Jetisý jáne Ulytaý oblystarynan Senat depýtattaryn saılaý týraly Jarlyqqa qol qoıǵan bolatyn.
