Erteń ulttyq sport túrlerinen І «Astana juldyzy» respýblıkalyq týrnıriniń ashylýy ótedi
ASTANA. QazAqparat - 10 qyrkúıekte «Qazanat» atshabarynda Qazaqstan Respýblıkasy táýelsizdiginiń 25 jyldyǵyna oraılastyrylǵan ulttyq sport túrlerinen birinshi «Astana juldyzy» respýblıkalyq týrnıri ashylady. Jarysqa Astana, Almaty qalalary men barlyq 14 oblystyń komandalary qatysady. Týrnırdi uıymdastyrýshylar - Astana qalasynyń ákimdigi men Qazaqstan Respýblıkasynyń Ulttyq sport túrleri qaýymdastyǵy, dep habarlady elorda ákiminiń resmı saıty.
Elorda turǵyndary men qonaqtary atshabarǵa №№ 27,43 qalalyq marshrýttarmen jáne qala mańyna qatynaıtyn №№302,303,308,309 baǵdarlarmen bara alady.
Qalyń jurtshylyq úsh kún boıy qazaqtyń ulttyq oıyndarynyń san túrin tamashalaı alady. Atap aıtqanda, kókpar, aýdaryspaq, toǵyzqumalaq pen asyq atý, sondaı-aq, teńge ilýdiń eń úzdik sheberleri men qyz qýýdyń teńdessiz juptarynyń óneri nazarǵa usynylady. Shý asaýdy júgensiz minetin júrekti jigitter asaý úıretý saıysyna túsedi.
Qyran baptap túlki, qasqyr aýlaǵan, qarshyǵa men suńqar baptap san túrli qus ildirgen qusbegiler kórsetilimi bolady, or qoıandy qyr asyrmaı ustaıtyn júırik tazylar festıvali ótedi.
Úsh kúndik týrnır barysynda áıgili óner ıeleriniń qatysýymen ótetin kontserttik baǵdarlamalar, qolóner kórmeleri jáne toıshy qaýymǵa arnap ulttyq taǵam túrlerinen festıvaldar uıymdastyrylady.
