Erteń Úkimette elimizdiń batys óńirindegi egistik alqaptardyń kúıip ketýine qatysty máseleler qaralady
ASTANA. Shildeniń 27-si. QazAqparat /Marlan Jıembaı/ - Erteń Úkimette elimizdiń batys óńirindegi astyqtyń kúıip ketýi, sondaı-aq atalǵan aımaqtaǵy elevatorlarǵa astyq jetkizý máselesi talqylanady. Bul týraly búgin Úkimet otyrysynan keıin BAQ ókilderine suhbat bergen Premer-Mınıstr Kárim Másimov aıtty.
«Bizde, Qazaqstanda tolyǵymen alǵanda boljamdy astyq túsimi ortasha bolady. Rekordtyq kórsetkish te, sondaı-aq nashar kórsetkish te bolmaıdy, ıaǵnı shyǵym ortasha. Negizinen bul túsim soltústik jáne birqatar ońtústik óńirlerdiń esebinen alynady. Bul oraıda men úlken problemalar kórip otyrǵan joqpyn», degen Úkimet basshysy qazirgi ýaqytta Batys Qazaqstan men Aqtóbe oblystarynda kúnniń ystyq bolýyna baılanysty astyqtyń kúıip ketýi tolǵandyryp otyrǵandyǵyn atap ótti. Onyń aıtýynsha, osy máselege baılanysty el Prezıdentiniń tapsyrmasymen Aýyl sharýashylyǵy mınıstri A.Kúrishbaev basshylyq etetin jumys toby qurylǵan. «Ol qazirgi ýaqytta qabyldanatyn sharalar toptamasyn usyndy. Erteń osy máselege baılanysty keńes ótkizemin. Al beısenbi kúni biz sharýalarǵa, sondaı-aq soltústik elevatorlardaǵy astyqty batys jáne respýblıkanyń basqa óńirlerindegi elevatorlarǵa ornalastyrýǵa qajetti sáıkesinshe Úkimet qaýlysyn qabyldaıtyn bolamyz», dedi ol.
Premer-Mınıstr elimizde astyqtyń jetkilikti ekendigin ári ol qolaıly baǵamen satyp alynǵandyǵyn aıta kele, «sondyqtan tutynýshylar úshin nannyń baǵasyn qoljetimdi deńgeıde ustap turamyz. Al kúnniń ystyq bolýy bir jaǵynan astyq quramyndaǵy balaýyzdyń jaqsy jınalýyna septigin tıgizedi», dedi.
