Erteń Túrkistanda 500 oqýshy «Adaı» kúıin oryndaıdy
TÚRKІSTAN. KAZINFORM - Balalardy qorǵaý kúnine oraı Túrkistanda «Baqytty balalyq shaq» merekelik is sharasy ótedi. Onda ár aýdan, qala mektepterinen jınalǵan oqýshylar bir mezettte Qurmanǵazynyń «Adaı», «Balbyraýyn» kúılerin oryndaıdy. Bul jaıynda Túrkistan oblysy bilim basqarmasy basshysynyń orynbasary Aıgúl Qasymbekova málimdedi.
Merekelik shara barysynda balalarǵa arnalǵan túrli qoıylymdar, kórmeler, sporttyq oıyndar, kontserttik baǵdarlamalar kópshilik nazaryna usynylady. Máselen, «Qýyrshaq» teatrynyń úzdik qoıylymdary men balalar jazýshylarynyń kitap kórmesin tamashalaýǵa múmkindik bar. Sondaı-aq, balalar úshin akvagrım jasalyp, tegin táttiler úılestiriledi.
Oqýshylardyń qolóner jumystarynyń jármeńkesi ótip, sheberlik sabaqtary uıymdastyrylady.
«Mektep oqýshylary men kolledj stýdentteri arasynda shahmat, toǵyzqumalaq oıyndarynan týrnır ótkizý, armrestlıng sportynan álem chempıondarymen sheberlik saǵatyn uıymdastyrý jáne «Araldaǵy tsırk» merekelik qoıylymyn kórsetý josparlanyp otyr. Sondaı-aq, «Túrkistan balalar kózimen» kórkemsýret galereıasy, 500 oqýshydan quralǵan «Dombyra party» flesh-moby, «Aıbyn» áskerı-patrıottyq qozǵalysy oqýshylarynan quralǵan top óneri kórermen nazaryna usynylady» - dedi Aıgúl Qasymbekova.
Sonymen qatar, spıker bıyl Túrkistan oblysynda 35 myńnan astam bala áleýmettik jaǵdaıyna baılanysty bıýdjet esebinen jazǵy saýyqtyrý lagerlerinde demalatyndyǵyn jetkizdi. Al, balalardyń jazǵy demalysyn uıymdastyrýda arnaıy daıyndyqtan ótken 14 444 pedagog qyzmet etedi.
