Erteń Túrkistan qalasyna jylý beriledi
Túrkistan oblysynda jylý berý maýsymy bastaldy, dep habarlaıdy kazinform.
Túrkistan oblysynyń taýly aımaqtaryndaǵy aýdan, qalalarda jylý berý maýsymy bastaldy. Al, erteń Túrkistan qalasyndaǵy kóp qabatty turǵyn úılerge jylý berile bastaıdy. Óńirdegi monoqala sanalatyn Kentaý qalasyn jylý maýsymyna qosý 1 qarashaǵa belgilenip otyr.
Túrkistan oblystyq energetıka jáne turǵyn úı-kommýnaldyq sharýashylyq basqarmasynan alynǵan málimetke júginsek, Túrkistan oblysy aldaǵy jylytý maýsymyna daıyn. Óńirdegi avtonomdy qazandyqtar, jylý jáne aýyz sý jelileri, bilim berý, densaýlyq saqtaý nysandary men kópqabatty turǵyn úılerdiń jylytý maýsymyna daıyndyǵy 100 paıyzdy qurap otyr.
Qazirgi tańda oblysqa 436 myń tonna kómir tasymaldanǵan. Energetıka mınıstrligi oblysqa qajetti 2,2 myń tonna áleýmettik mazýtty tasymaldaıtyn operatorlardy anyqtap bekitip bergen. 1 tonna mazýttyń baǵasyn 115 myń teńgeden túsip otyr. Qazirgi tańda tasymaldaý boıynsha tıisti jumystar júrip jatyr.
Oblystaǵy negizgi iri energııa kózi bolyp tabylatyn Kentaý jylý ortalyǵyndaǵy 4 qazandyq demeýshiler esebinen aǵymdaǵy jóndeýden ótkizildi. Budan bólek, oblystyq bıýdjetten bólingen 3 mlrd. teńgege 4 qazandyqty qaıta jańǵyrtý jumystary júrgizilip jatyr. Qazirgi tańda demontaj jumystary tolyq aıaqtalǵan. Tek jańa qurylǵylardy ornatý, tekserý jumystary atqarylýda. Kentaý jylý elektr ortalyǵy 3 myńnan astam nysandy, onyń ishinde kópqabatty jáne jer úılerdi, kommertsııalyq jáne bıýdjettik uıymdardy jylýmen jáne elektr energııasymen qamtamasyz etedi.
Mamandardyń aıtýynsha oblystaǵy jylý jelilerine tutastaı tehnıkalyq zertteý de júrgizilgen. Jylý jelileriniń tozýy 44,8 paıyzdy qurap otyr, olardy rekonstrýktsııalaý boıynsha 2025 jylǵa deıin arnaıy is-sharalar jospary da jasalǵan.
«Qazirgi tańda, respýblıkalyq bıýdjetten bólingen 3,8 mlrd.teńge qarjyǵa Kentaý qalasyndaǵy 4,7 shaqyrym magıstraldy jylý jelilerinde jóndeý jumystary aıaqtaldy. 95,4 shaqyrym jylý jelilerin rekonstrýktsııalaý boıynsha 2 joba ázirlenýde, qurylys-montaj jumystarynyń quny shamamen 10,5 mlrd. teńgeni quraıdy. Aldaǵy jylytý maýsymyna daıyndyq jumystary turaqty baqylaýda» - delingen Túrkistan oblystyq energetıka jáne turǵyn úı-kommýnaldyq sharýashylyq basqarmasy tarapynan usnylǵan aqparatta.
Aıta keteıik, jýyrda Premer-Mınıstr Álıhan Smaıylov Kentaý qalasyna baryp, jylý ortalyǵynyń jumysymen tanysqan bolatyn.