Erteń «Táýelsizdik tolǵaýy» jáne «Elim meniń» baıqaýlarynyń laýreattary marapattalady

ASTANA. 4 jeltoqsan. QazAqparat - Erteń, 5 jeltoqsan kúni saǵat 19.00-de Astana qalasyndaǵy K.Baıseıitova atyndaǵy Ulttyq opera jáne balet teatrynyń kontsert zalynda ІІІ Respýblıkalyq «Táýelsizdik tolǵaýy» konkýrsy jáne IX Respýblıkalyq «Elim meniń» patrıottyq ánder konkýrsy laýreattaryn saltanatty túrde marapattaý rásimi ótedi.

 Bul jaıynda QR Mádenıet jáne aqparat mınıstrliginiń baspasóz qyzmeti habarlap otyr.
«Táýelsizdik tolǵaýy» respýblıkalyq konkýrsyn jyl saıyn Qazaqstannyń Táýelsizdik kúni qarsańynda ótkizý dástúrge aınalǵan úrdis. Konkýrstyń basty maqsattary - zaman talabyna saı jańa qoǵamdyq-mańyzdy dramalyq jáne mýzykalyq shyǵarmalardyń jazylýyna jol ashý; otandyq avtorlardy qoldaý; respýblıka teatrlary men kontserttik uıymdary repertýarlaryn búgingi kúnniń talabyna saı kórkemdik deńgeıi joǵary jańa týyndylarmen tolyqtyrý; óner týyndylary arqyly qazaqstandyq otansúıgishtik pen ulttyq mádenıetke degen súıispenshilikti qalyptastyrý; mádenıet salasyndaǵy memlekettik saıasatty júzege asyrý.
Konkýrs laýreattary «Jastar aýdıtorııasyna arnalǵan eń úzdik mýzykalyq-dramalyq kólemdi shyǵarma (mıýzıkl, rok-opera, opera, balet)», «Qazaq halyq aspaptaryna (qobyz, dombyra, sybyzǵy) arnalǵan kishi kólemdi eń úzdik shyǵarma (kúı)», «Eń úzdik balalar áni», «Horǵa arnalǵan eń úzdik shyǵarma» jáne «Qýyrshaq teatrlaryna arnalǵan eń úzdik dramalyq shyǵarma» atalymdary boıynsha marapattalady.

Sondaı-aq IX Respýblıkalyq «Elim meniń» patrıottyq án konkýrsy laýreattaryn saltanatty túrde marapattaý rásimi ótedi.

Konkýrsty ótkizý maqsaty jas urpaqty otan súıgishtikke tárbıeleý jáne patrıottyq shyǵarmalardyń avtorlaryna ataýly qoldaý kórsetý, otandyq oryndaýshylardyń repertýarlaryn patrıottyq taqyryptaǵy jańa mýzykalyq shyǵarmalarmen tolyqtyrý, qazaqstandyq án týyndylarynyń básekelestigin arttyrý bolyp tabylady.

Konkýrs «Atameken», «Amanat» jáne «Án sal, sarbaz!» atalymdary boıynsha laýreattardy marapattaıdy.