Erteń Senattyń jalpy otyrysy ótedi
ASTANA. 18 qańtar. QazAqparat /Qanat Mámetqazyuly/ - Búgin Senat spıkeri Qaırat Mámıdiń tóraǵalyq etýimen Parlament Senatynyń Bıýro otyrysy bolyp ótti.
Onda palatanyń 2012 jylǵy 19 qańtardaǵy otyrysynyń kúntártibi boıynsha usynystar qaraldy. Bul týraly Senattyń baspasóz qyzmetinen habarlandy.
Otyrystyń kún tártibine M.Álimbekovti jáne J.Báıishevti Qazaqstan Respýblıkasy Joǵarǵy Sotynyń sýdıalary qyzmetinen bosatý týraly másele alǵashqy bolyp shyǵarylady. Sonymen birge birqatar halyqaralyq kelisimder, sharttar men konventsııalardy da qaraý josparlanyp otyr.
Olar - Qazaqstan Respýblıkasy men Koreıa Repýblıkasy arasyndaǵy Ustap berý týraly shart, Birikken Ulttar Uıymy men Qazaqstan Respýblıkasynyń Úkimeti arasyndaǵy Qazaqstanda Birikken Ulttar Uıymynyń Ókildigin ashý týraly kelisim, Oryndaýshylardyń, fonogramma jasaýshylardyń jáne habar taratý uıymdarynyń quqyqtaryn qorǵaý týraly halyqaralyq konventsııa, Anany qorǵaý týraly 1952 jylǵy (qaıta qaralǵan) konventsııany qaıta qaraý týraly konventsııa týraly zań jobalary.
Sondaı-aq «Qazaqstan Respýblıkasy men Azııa Damý Banki arasyndaǵy Qaryz týraly kelisimdi (Jaı operatsııalar) (OAÓEY 2 kólik dálizi úshin Investıtsııalyq baǵdarlama (Mańǵystaý oblysyndaǵy ýchaskeler) - 1-joba) ratıfıkatsııalaý týraly» zań jobasy da talqylanatyn boldy. Otyrysta elimizdiń keıbir zańnamalyq aktilerine isterdi qaraýdyń apellıatsııalyq, kassatsııalyq jáne qadaǵalaý tártibin jetildirý, senim deńgeıin arttyrý jáne sot tóreligine qol jetimdilikti qamtamasyz etý, probatsııa qyzmeti, qorǵanys jáne áskerı qyzmet máseleleri boıynsha ózgerister men tolyqtyrýlar engizý týraly zań jobalary da qaralatyny kózdelgen.
Sonymen qatar, «Qazaqstan Respýblıkasynyń keıbir zańnamalyq aktilerine básekege qabiletti kásiporyndardy saýyqtyrý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda qaralady.
