Erteń «Saǵattar syr shertedi» atty kórme ashylady

Qazaqstan Respýblıkasynyń Prezıdenttik mádenıet ortalyǵynda Halyqaralyq murajaı kúni qarsańynda ıgi sharalar ótkizý jyl saıynǵy dástúrge aınalǵan. Bıyl da ortalyq murajaı qoryndaǵy saǵattar negizinde qala turǵyndary men qonaqtaryna ár túrli dáýirge qatysty ýaqyt ólsheminiń tarıhı betterin paraqtaıtyn saǵat sheberleriniń týyndylaryn tamashalaý múmkindigin syılaǵaly otyr.

Atalǵan kórmede kórermender ortalyqtyń negizgi qorynan alynǵan XIX ǵ. aıaǵy -XX ǵ. basyndaǵy, Uly Otan soǵys kezindegi, tyń ıgerý jyldaryndaǵy jáne elimiz táýelsizdik alǵannan bergi kezeńindegi saǵat sheberleriniń qabyrǵa, qalta, qol, munaraly jáne t.b. túrlerinen jınaqtalǵan ártúrli úlgidegi 50-ge jýyq saǵat týyndylaryn tamashalaı alady.

Olardyń ishinde attary ańyzǵa aınalǵan «Pavel Býre», «Longines», «Omega», «Orient», «Slava», «ıAntar» fırmalarynyń qalta saǵattaryn, ataqty aqmolalyq Kýbrın kópesiniń úıindegi bólme saǵatyn, general-maıor, UOS jyldarynda Berlındegi áskerı qımyldardyń qatysýshysy A.Popechıtelevtiń jeke kesheninen alynǵan Gebbelstiń aǵa hatshysyna tıesili trofeılik saǵatyn, UOS ardageri B.B.Baıtasovtyń, kórnekti saıası qaıratker M.T.Ospanovtyń, ǵylymı qaıratker Á.Ermekovtyń, 1917 j. revolıýtsııanyń beldi qatysýshysy, temir jol qurylysynyń ardageri E.F.Bereznevtyń, UOS jyldarynda Tegerandaǵy «Iransovtranstyń» jumyskeri M.P.Odıntsovanyń, I.E.Kornılovtyń saǵattaryn erekshe atap ótýge bolady.

Sondaı-aq, kelýshilerdiń nazaryna Qazaqstan Respýblıkasynyń Prezıdenti N.Á.Nazarbaevqa Lıtva Respýblıkasynyń Prezıdenti A.Brazaýskastyń syıǵa tartqan ústel saǵaty usynylady.

Іs-sharaǵa QR Mádenıet mınıstrligi, BAQ ókilderi, L.N.Gýmılev atyndaǵy Eýrazııa Ulttyq ýnıversıtettiń oqytýshylary men stýdentteri, sonymen qatar qala turǵyndary men sheteldik qonaqtar qatysady.

Kórme 25 mamyrǵa deıin jalǵasady.