Erteń respýblıkanyń basym bóliginde aýa raıy turaqsyz bolady
ASTANA. 3 jeltoqsan. QazAqparat - Erteń Qazaqstan respýblıkasynyń basym bóliginde atmosferalyq aǵyndardyń ótýine baılanysty aýa raıynyń turaqsyzdyǵy saqtalady, keı jerlerde jaýyn-shashyn bolady, tuman túsedi, kóktaıǵaq bolady, jel kúsheıedi. Respýblıkanyń soltústik-batysynda boran soǵyp, jel kúsheıedi. Bul týraly «Qazgıdrometke» silteme jasap, QR TJM baspasóz qyzmetinen habarlady.
Aqmola, Aqtóbe, Soltústik Qazaqstan oblystarynda keı jerlerde azdap boran soǵady, tuman túsedi, kóktaıǵaq bolady, jel 15-20 m/s-ke soǵady. Almaty oblysynyda túnde jáne tańerteń keı jerlerde tuman túsedi, Jalańashkól aýdanynda jel 18-23 m/s-ke kúsheıip, kúndiz jel ekpini 25 m/s bolady. Mańǵystaý, Atyraý, Qostanaı, Pavlodar oblystarynyń jekelegen aýdandarynda boran soǵady dep kútilýde, kóktaıǵaq bolady, jeldiń ekpini 15-22 m/s bolady. Qaraǵandy oblysynda túnde keı jerlerde tuman túsedi dep kútilýde, kóktaıǵaq bolady, 15-20 m/s jel soǵady. Shyǵys Qazaqstan oblysynyń jekelegen aýdandarynda jel 17-22 m/s-ke kúsheıedi, túnde jáne tańerteń tuman túsýi yqtımal. Jambyl oblysynda keı jerlerde tuman túsedi dep kútilýde, 15-20 m/s jel soǵady. Ońtústik Qazaqstan, Qyzylorda oblystarynda tuman túsýi múmkin, kúndiz jel 15-20 m/s-ke kúsheıedi. Batys Qazaqstan oblysynda keı jerlerde tuman túsedi.
Jaqyn táýlikterde Batys Altaıdyń (ShQO) jekelegen ózenderinde sý deńgeıi kóterilýi múmkin. Qyzylorda oblysy aýmaǵynda Syrdarııa ózeninde ózen arnalaryn retteý esebinen sý deńgeıiniń turaqsyzdyǵy baıqalady.
Qazaqstannyń batys, soltústik jáne shyǵys oblystarynyń ózenderinde muz qalyptasý úrdisi jalǵasady.
