Erteń respýblıka boıynsha «Jasyl japyraq» aktsııasy ótedi

Mels Eleýsizovtiń qatysýymen baspasóz máslıhaty bolyp ótti. Onda respýblıka boıynsha bir mezgilde jasyl ekpeler otyrǵyzý jónindegi «Jasyl japyraq» aktsııasyn ótkizý jaıynda sóz boldy.

Aktsııa «Tabıǵat» ekologııalyq odaǵynyń tóraǵasy Mels Eleýsizovtiń bastamasy boıynsha kóterilgen máseleler aýqymynan týyndap otyr. Uıymdastyrýshylardyń aıtýynsha, shara Qazaqstan Respýblıkasy Táýelsizdiginiń 20 jyldyǵyna arnalady jáne Dúnıejúzilik Jer Kúnin merekeleýge tuspa-tus keltirilip otyr. Aktsııanyń ótkizilýi halyqtyń qalyq buqarasy men qoǵamdyq uıymdardy jumyldyryp, Astana ýaqytymen 23 sáýirde 11:00 saǵatta bastalady.

Sharany ótkizýdegi maqsat - bul eldi mekenderdi kóriktendirý, ekologııa máselelerin ornyqty sheshý, jastardy týǵan ólkege jáne elimizdiń bolashaǵyna qamqorlyq jasaý rýhynda tárbıeleý. Osyǵan oraı, respýblıkamyzdyń qalalary men basqa da eldi mekenderinde 100 myń túpten astam aǵash pen buta otyrǵyzý josparlanýda. «Qazirgi kezde barlyq oblystarda kóshet materıaly daıyndaldy, aǵash otyrǵyzylatyn jerler, otyrǵyzylǵan ekpelerge kútim jasaý jáne olardy aldaǵy ýaqytta saqtaý boıynsha jaýapty tulǵalar belgilendi. Jalpy alǵanda aktsııaǵa 1 mln. 200 myńnan astam adam, onyń ishinde 360 myńǵa jýyq jastar qatysady. Sharaǵa Orman jáne ańshylyq sharýashylyǵy komıtetiniń barlyq vedomstvolyq baǵynysty uıymdary belsene qatysady, olar qazirgi kúni 140 myń danadan astam kóshet materıalyn daıyndady. Jalpy alǵanda oblystar ákimdikteriniń qaraýyndaǵy orman sharýashylyǵy memlekettik mekemeleri men Orman jáne ańshylyq sharýashylyǵy komıtetiniń tabıǵat qorǵaý mekemeleri 23 sáýirdegi aktsııa sheńberinde memlekettik orman qory aýmaǵynda aǵash tuqymdarynyń 3,4 mln. danadan astam tal shybyqtary men kóshetterin otyrǵyzatyn bolady», - delingen aýyl sharýashylyǵy mınıstrliginiń taratqan baspasóz baıanynda.

«Jasyl japyraq» aktsııasy jyl saıyn kóktemgi Naýryz merekesi kezinde 22 naýryzdan 22 sáýirge deıingi aralyqta ótkizilip turmaq.