Erteń Pavlodar óńiriniń 1-9 synyptary qashyqtan oqıdy

PAVLODAR. KAZINFORM — 10 jeltoqsanda aýa raıynyń qolaısyzdyǵyna baılanysty Pavlodar, Ekibastuz, Aqsý qalalaryndaǵy mektepterdiń 1-9 synyp oqýshylary qashyqtan oqytý formatyna aýystyrylady. 

Bul týraly óńirlik bilim berý basqarmasynyń baspasóz qyzmeti habarlady.

— 2025 jylǵy 10 jeltoqsanda Pavlodar qalasynyń barlyq mektebinde qolaısyz aýa raıyna baılanysty mektepaldy daıarlyq toptary men 1–9 synyptardyń birinshi aýysym oqýshylary qashyqtyqtan oqytý formatyna aýystyrylady, — dep málimdedi basqarmadan.

Sondaı-aq Ekibastuz jáne Aqsý qalalarynyń bilim berý bólimderi de osyndaı sheshim qabyldaǵan. Atalǵan óńirlerdegi barlyq mektepte oqýshylardy tasymaldaý toqtatylady.

Aýa raıyn boljaýshylar Kereký óńirine sýyq aýa aǵyndaryn ákelgen antıtsıklon áli de jalǵasatynyn málimdedi.

«Qazgıdromet» RMK oblystyq fılıalynyń habarlaýynsha, Ertis-Baıan óńirinde 10 jeltoqsanda aýa temperatýrasy túnde mınýs 25-28, kúndiz mınýs 20-25 gradýs bolady. Jeldiń ekpini sekýndyna 9-14 metr, keı jerlerde 20 metrge deıin jetýi múmkin. Aımaqtyń ońtústigi men shyǵysynda qar jaýyp, burqasyn turady. Soltústik-shyǵys óńirlerde tuman túsedi.

Aıta ketelik, 9 jeltoqsan kúni Pavlodar jáne Aqsýda tústen keıin oqıtyn 1-4 synyp oqýshylary qashyqtan oqýǵa aýystyrylǵany týraly habarlaǵanbyz.