Erteń Ózbekstan, Tájikstan jáne Qyrǵyzstan prezıdentteriniń alǵashqy sammıti ótedi
TAShKENT. KAZINFORM – 31 naýryzda Tájikstannyń Hýdjand qalasynda Shavkat Mırzıeev, Emomalı Rahmon jáne Sadyr Japarov bas qosady, dep habarlaıdy Kazinform agenttiginiń menshikti tilshisi.
Osy oraıda alǵashqy úshjaqty sammıtttiń mán-mańyzy men onyń barysynda talqylanýy yqtımal máselelerge qatysty belgili ózbekstandyq saıasattanýshy Farhod Tolıpov pikir bildirdi.
— Keıingi jyldary Ortalyq Azııa memleketteri basshylarynyń Konsýltatıvtik kezdesýi aıasynda aımaqtyq yntymaqtastyq damyp keledi. Bul rette elder arasynda ekijaqty formattaǵy kelissózder de júrip jatyr. Josparlanyp otyrǵan úshjaqty sammıt yntymaqtastyq jolynda ózara is-qımyldardy pysyqtaýǵa múmkindik beretin taǵy bir alań bolmaq. Sondyqtan onyń barysynda atalǵan úsh memleketke ǵana tán máseleler talqylanady. Tıisinshe, Ózbekstan, Tájikstan jáne Qyrǵyzstan basshylarynyń sammıti uıymdastyrylyp otyr, - dedi Farhod Tolıpov.
Saıasattanýshy atap ótkendeı, sammıt aıasynda Tájikstan men Qyrǵyzstan arasyndaǵy shekara máselesine núkte qoıylmaq.
— Qyrǵyzstan men Tájikstan taıaýda ǵana shekara máselesin rettedi. Bul kelissózderdi uıymdastyrý jáne eki el arasyndaǵy túıtkildi sheshýge Ózbekstan da aıtarlyqtaı kúsh saldy. Sondyqtan shekara máselesine núkte qoıyp, ony resmı qujat retinde bekitý mańyzdy. Aıta ketý kerek, Ózbekstan, Tájikstan jáne Qyrǵyzstannyń shekaralary bir aımaqta toǵysady. Osyǵan baılanysty atalǵan máseleniń kún tártibinde bolatyny sózsiz, - dep pikir qosty saıasattanýshy.
Farhod Tolıpovtyń paıymynsha, Konsýltatıvtik kezdesýdiń mártebesin kóteretin ýaqyt keldi. ıAǵnı, óńirlik yntymaqtastyqty tıimdi ilgeriletý úshin bul formatty Keńes deńegeıine shyǵarý qajet.
— Bıyl Ózbekstanda Ortalyq Azııa memleketteri basshylarynyń jetinshi Konsýltatıvtik kezdesýi ótedi. Tıisinshe, Tájikstannyń Hýdjand qalasynda ótetin sammıt atalǵan is-sharaǵa daıyndyq bolýy da múmkin. Óıtkeni, aımaqtaǵy ıntegratsııany jańa deńgeıge shyǵarý kerek. Osyǵan baılanysty Konsýltatıvtik kezdesýde ınnovatsııalyq sheshimder qabyldanýy yqtımal. Sondyqtan suraqtardy aldyn ala talqylap, kezdesýge daıyndyq barysyn pysyqtaý qajet, - dedi Farhod Tolıpov Kazinform tilishisiniń saýalyna jaýap bere otyryp.
Saıasattanýshynyń pikirinshe, tranzıttik dálizderdi damytý máselesi de sammıttiń kún tárbinde bolady. Farhod Tolıpovtyń oıy Ortalyq Azııa elderiniń eksporttyq áleýetin arttyrý óńir memleketteriniń álemdik saıasattaǵy salmaǵyn arttyra túsedi degenge saıady.
— Qazirgi jahandaný kezeńi kólik-logıstıkalyq baılanystardy damytýdy qajet etedi. Sondyqtan josparlanyp otyrǵan sammıt barysynda mýltımodaldyq dálizder máselesi de nazardan tys qalmaıdy. Sanktsııalar jaǵdaıynda Ortalyq Azııanyń bir elinde týyndaǵan másele kórshiles memleketterge de áser etpeı qoımaıdy. Osy turǵydan alǵanda bizge yntymaqtastyqty nyǵaıtý kerek. ıAǵnı, bir-birimizdi habardar ete otyryp áreket etýimiz kerek, - dep túıindedi Farhod Tolıpov.
Eske salaıyq, taıaýda Kazinform agenttigine suhbat bergen Ózbekstannyń burynǵy Syrtqy ister mınıstri Saıdmýhtor Saıdkasymov Ortalyq Azııanyń álemdik saıasattaǵy salmaǵy arta túskenin málimdep edi.