Erteń «MýzART LIVE» telejobasyna irikteý bastalady
ASTANA. QazAqparat - Erteń «MýzART LIVE» ulttyq mýzykalyq telejobasyna irikteý bastalady jáne ol tek qazaq tilinde ótkizilmek. Bul týraly búgin Ortalyq kommýnıkatsııalar qyzmetinde ótken baspasóz máslıhatynda joba prodıýseri, tanymal otandyq kompozıtor Rınat Gaısın málim etti.
Onyń sózine qaraǵanda, «MýzART LIVE» jobasyna tek jigitter qatysa alady.
«MýzART LIVE» jobasy úsh kezeńnen turatyn bolady. Birinshi kezeńde - 15 naýryzdan 15 sáýir aralyǵynda onlaın-kastıng ótkiziledi. Ekinshi kezeń - ol MýzART tobynyń qatysýymen aımaqtyq irikteý jáne ol 10 mamyrdan 25 mamyr aralyǵynda ótedi. Aımaqtyq irikteý Astana, Almaty, Atyraý, Semeı, Shymkent qalalarynda ótkiziledi. Úshinshi kezeń - iriktelgen 60 úmitkerdiń qatysýymen ótetin televızııalyq joba. Aıta ketý kerek, jobaǵa tek jigitter qatysady jáne joba barysynda tek qazaq tilindegi ánder oryndalady», - dep atap ótti R.Gaısın.
Onyń sózine qaraǵanda, ulttyq mýzykalyq telejobanyń ІІІ-kezeńi úmitkerlerge teletúsirilimge qatysý múmkindigin beredi. Onda úmitkerler stıl, ımıdj, repertýar, horeografııa salasy boıynsha uıymdastyrý komıtetinen keńes alady. Aqtyq synda bar-joǵy 6 adam baǵyn synaıdy.
