Erteń musylman qaýymy úshin qasıetti Ramazan aıy bastalady
ASTANA. Tamyzdyń 10-y. QazAqparat /Gúlmıra Álıakparova/ - Tamyzdyń 11-shi kúni bop tabaldyryqtan attaıtyn aldaǵy tún ortasynan musylman qaýymy úshin qasıetti Ramazan aıy bastalady. Bul aıǵa aman-esendikte jetken árbir musylman balasy, Uly Jaratýshynyń atyna madaq aıtyp, onyń razylyǵy úshin erteńgi sáresiden bastap bir aı boıy aýyzdaryn bekitedi.
Oraza ǵıbadaty - Alla Taǵalanyń óz pendelerine mindet etken bes paryzdyń birinen sanalady. Oraza ózin musylman sanaǵan balıǵat jasyndaǵy adamǵa mindet bolyp tabylady. Tek aýrýlarynan aıyǵý úmit etilmegen jandar men oraza ustaýǵa shamasy kelmeıtin qart kisiler ǵana áleýmettik álsiz jandarǵa fıdııa tólemin berýmen bosatylady.
Tamyzdyń 11-inde bastalǵan oraza qyrkúıektiń 8-i kúni támamdalyp, jıyrma toǵyz kún tutylady. Bul kúnderi musylman baýyrlar birin-biri aýyzasharǵa shaqyryp, jaqsy tilekter aıtady.
Ramazan - arab sózi, túbiri «ramzaý» - «óte ystyq» degen maǵynany bildiredi. Ǵulamalar muny: «Ramazan aıynda oraza ustaǵan pendeniń boıyna bitken kishigirim kúná-kemshilikteri kúıip ketedi», - dep túsindiredi. Sondyqtan, Ramazan aıy kúnálar keshiriletin aı dep te aıtýǵa bolady. Oraza adam balasyn jumsaqtyq pen meıirimdilikke, baýyrmaldyq pen sabyrlylyqqa tárbıeleıtin, jynystyq nápsini tııatyn ǵıbadat. Termızı kitabynda: «Oraza - sabyrlylyqtyń jartysy» dep aıtylsa, Ibn Masýd (r.a.) «Sabyrlylyq - ımannyń jartysy», - degen hadıs jetkizgen.
Medıtsına mamandary bir aı boıy ózin tamaqtan shekteýdiń aǵzaǵa tıgizer mol paıdasyn da dáleldegen. Máselen, oraza aǵzanyń ımmýndyq júıesin kúsheıtedi, semizdik pen onyń saldarynan, baýyrda tastardyń jınalýynan jáne qýyq joldarynda zár tuzdarynyń túzilýinen saqtaıdy. Sondaı-aq denedegi jasýshalarǵa turyp qalatyn qaterli ýlaǵysh zattardan qorǵap, retteıdi.
Orazanyń ár kúninde barlyq meshitterde Taraýıh namazy oqylyp, Quran kárim hatym túsiriledi. Sonymen qatar, osy aıda Jaratýshyǵa jaqyndaı túsýdiń taǵy bir amaly - tań atqansha kóz ilmeı, Alla taǵala atyna madaq aıtyp, duǵa baǵyshtap, Qadir túnin atqarý násip etilgen. Bıyl Qadir túni qyrkúıektiń 5-inen 6-syna qaraǵan túnge sáıkes kelip tur.
Alla Taǵala óziniń rızalyǵy úshin bir aı boıy aýyzdaryn bekitken jandarǵa Ramazan aıynan keıin keletin - Aıt kúnderinen bastap aýyz ashýǵa ruqsat bergen. Bıyl Aıt merekesi qyrkúıektiń 9, 10, 11 kúnderi atap ótiledi. Aǵymdaǵy jyly bir pitir sadaqanyń mólsheri - 140 teńge kóleminde bekitildi.
Ustaǵan orazalaryńyz qabyl bolsyn! Alla Taǵala barshańyzdy kelesi Ramazan aıyna din aman jetýge jazsyn!
