Erteń Mırzıeev pen Pýtın Sankt-Peterbýrgte kezdesý ótkizedi
TAShKENT. KAZINFORM — Ózbekstan basshysy Shavkat Mırzıeev Reseı prezıdenti Vladımır Pýtınniń shaqyrýymen 4-5 maýsym kúnderi jumys saparymen Sankt-Peterbýrg qalasyna barady, dep habarlaıdy Kazinform agenttiginiń Tashkenttegi menshikti tilshisi.
Ózbekstan prezıdentiniń baspasóz qyzmetinen málim etkendeı, Shavkat Mırzıeev «Pragmatıkalyq dıalog — turaqty keleshekke jol» atty 29-shy Peterbýrg halyqaralyq ekonomıkalyq forýmynyń plenarlyq otyrysyna qatysyp, sóz sóıleıdi.
Kórshiles eldiń prezıdenti álemdik ekonomıkadaǵy ahýal, Ózbekstan men Reseı arasyndaǵy ekonomıkalyq yntymaqtastyqty ilgeriletý múmkindikteri boıynsha óz kózqarasyn baıandaıdy.
Sondaı-aq, sapar aıasynda Shavkat Mırzıeev Vladımır Pýtınmen kezdesý ótkizedi. Buǵan qosa prezıdentter Ózbekstandaǵy alǵashqy atom elektr stantsııasynyń qurylysyn resmı bastaýǵa arnalǵan saltanatty rásimge qatysady.
Eske salaıyq, Ózbekstanda AES salynatyn alańda daıyndyq jumystary júrip jatyr.
Buǵan deıin habarlaǵanymyzdaı, MAGATE ókilderi AES qurylysynyń barysyn baqylaý úshin bıyl Ózbekstanǵa barady.
Qosa ketsek, Ózbekstanda salynatyn AES eldiń úsh óńirin elektr qýatymen qamtamasyz etedi.
