Erteń Májilistiń jalpy otyrysynda jańa Salyq kodeksi talqylanady
ASTANA. KAZINFORM – 9 sáýir kúni Parlament Májilisiniń jalpy otyrysynda jańa Salyq kodeksiniń jobasy men ilispe qujat qaralady. Jalpy otyrysty Jibek Joly telearnasy tikeleı efırde kórsetedi.
Atap aıtqanda, palata otyrysynda Qazaqstan Respýblıkasy Salyq kodeksiniń jobasy men «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasy birinshi oqylymda talqylanady.
Bul eki qujat boıynsha Premer-Mınıstrdiń orynbasary – Ulttyq ekonomıka mınıstri Serik Jumanǵarın baıandama jasap, depýtattardyń suraqtaryna jaýap beredi.
Budan bólek, Májilis depýtattary «Qazaqstan Respýblıkasynyń keıbir zańnamalyq aktilerine qarjy naryǵyn damytý jáne qarjylyq kórsetiletin qyzmetterdi tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda qaraıdy.
Májilistiń jalpy otyrysy 9 sáýir kúni saǵat 10:00-de bastalady.
Eske salsaq, bıyl aqpan aıynyń basynda Premer-Mınıstr Oljas Bektenov Úkimet otyrysynda Salyq kodeksiniń jańa redaktsııasyn 20 aqpanǵa deıin Májiliske engizýdi tapsyrdy.
Jaqynda Ulttyq ekonomıka mınıstriniń birinshi orynbasary Azamat Ámrın Senatta ótken dóńgelek ústelden keıingi baspasóz máslıhatynda Májiliste jatqan Salyq kodeksiniń jańa redaktsııasynda sán-saltanat salyǵy qalaı esepteletinin aıtty.