Erteń Qytaıdyń Gýanchjoý qalasyndaǵy XVI jazǵy Azııa oıyndary bastalady
ALMATY. 11 qarasha. QazAqparat /Erbol Turymbetov/ - Erteń Qytaıdyń Gýanchjoý qalasyndaǵy XVI jazǵy Azııa oıyndary bastalady. Qarashanyń 12-27 aralyǵynda ótetin dodada qazaq eliniń sportshylary 36 sport túrinen el namysyn qorǵaıdy. Al jalpy, oınydarda sporttyń 57 túrinen medaldar jıyntyǵy sarapqa salynady.
Jalpy, Azııa oıyndaryna Qazaqstannan barlyǵy 341 sportshy attandy. Komanda quramynda 1 Olımpıada chempıony, 7 Olımpıada júldegeri, álem chempıonattarynyń 7 chempıony men 11 júldegeri jáne ár túrli Azııa chempıonattarynyń 47 chempıony men 76 júldegeri bar.
Olardyń qatarynda aýyr atletıkadan Olımpıada oıyndarynyń chempıony, 2 dúrkin álem chempıony Ilıa Ilın, Olımpıada oıyndarynyń qola júldegerleri - Áset Mámbetov pen Nurbaqyt Teńizbaev (grek-rım kúresi), Arman Shilmanov (taekvondo), Taımýraz Tıgıev (erkin kúres), Marııa Grabovetskaıa (aýyr atletıka), sońǵy 2 álem chempıonatynyń jeńimpazdary: Serik Sápıev (boks), Svetlana Podobedova, Maııa Maneza (aýyr atletıka), sońǵy álem chempıondary: Zúlfııa Chınshanlo (aýyr atletıka), Maksım Rakov (dzıýdo), Dmıtrıı Karpov, Olga Rypakova (aýyr atletıka), Dmıtrıı Gaag (trıatlon), Vladıslav Polıakov (júzý), Halıd Halıdov (karate-do), Dármen Sadýaqasov (shahmat), Olga Dovgýn (nysana kózdeý).
Qazaqstan delegatsııasynyń 41,6 paıyzy Almaty qalasynyń, 12,7 paıyzy Ońtústik-Qazaqstan oblysynyń, 7,2 paıyzy Qaraǵandy oblysynyń jáne 6,3 paıyz Astana qalasynyń, qalǵan 33 paıyzy elimizdiń basqa óńirleriniń sportshylary tolyqtyrǵan.
Ulttyq qurama bul oıyndarda jalpy sany - 25 altyn enshilep, komandalyq 4 oryndy ıelenýdi josparlap otyr.
