Erteń Qytaıdaǵy týrızm jyly resmı túrde bastaý alady
BEIJІŃ. KAZINFORM – 28 naýryzda Beıjińde Qytaıdaǵy Qazaqstan týrızmi jylynyń resmı ashylýy ótedi. 2024 jyldyń Qytaıdaǵy Qazaqstan týrızmi jyly bolyp jarııalanǵany Qasym-Jomart Toqaevtyń 2023 jyly Qytaıǵa resmı sapary barysynda belgili boldy.
Qazirgi tańda Beıjińge Qazaqstannyń resmı delegatsııasy kelip jetti. Onyń quramynda Premer-Mınıstrdiń orynbasary, Syrtqy ister mınıstri Murat Nurtileý, Týrızm jáne sport mınıstri Ermek Marjyqpaev, sondaı-aq ákimdikterdiń, «Kazakh Tourism» Ulttyq kompanııasynyń, «Atameken» UKP-nyń ókilderi men 150-den astam mádenıet qaıratkerleri bar.
Qazirgi tańda resmı is-sharalar ótetin nysandarda qyzý daıyndyq barysy júrip jatyr. Konferents zal men kontserttik zaldar qonaqtardy kútýge ázirlenip, ártistik ujymdar daıyndyqtaryn júrgizip jatyr.
Jyldyń ashylýy aıasynda birqatar is-shara ótedi. Olar Týrızm jáne ınvestıtsııalardy damytý boıynsha Qazaqstan-Qytaı forýmy, Qazaqstan oblystarynyń kórmesi, etnoaýyldaǵy mádenı is-sharalar, sonymen qatar gala-kontsert bolmaq. Uıymdastyrýshy – Qazaqstan Respýblıkasy Týrızm jáne sport mınıstrligi.
Aıta keteıik, forýmǵa qatysýshylar Qazaqstannyń 17 oblysynyń stendterin tamashalaı alady. Onda árbir óńirdiń týrıstik nysandary kórsetilgen.
Sondaı-aq forým aıasynda týrızm salasyndaǵy memlekettik organdar men kompanııalardyń qatysýymen eki paneldik sessııa ótedi. Birinshi sessııa «Qytaı saıahatshylary úshin Qazaqstandaǵy uıymdastyrylǵan týrızm múmkindikteri», ekinshi sessııa «Týrıstik bıznestegi áriptestik: Qazaqstan-Qytaı arasyndaǵy ınvestıtsııalyq múmkindikter». Oǵan qosa, forým barysynda «Kazakh Tourism» ulttyq kompanııasy men Messe Frankfurt Asia Holding ókilderi arasynda ózara túsinistik týraly memorandýmǵa qol qoıylady.
Óz kezeginde Qazaqstan mádenıetin gala-kontsertte óner kórsetetin ártister tanystyrady. Olardyń qatarynda shyǵarmashylyq mýzyka jáne bı ujymdary, sondaı-aq Roza Rymbaeva, Álı Oqapov, Maıra Muhamedqyzy, Zarına Altynbaeva, «Ulytaý» toby jáne basqa da jarqyn solıster bar. Gala-kontsertte Qytaıdyń ónerpazdary da óner kórsetedi.
Oǵan qosa, delegattar qatarynda Olımpıada chempıony Serik Sápıev, UFC sportshysy Shavkat Rahmonov pen Olımpıada júldegeri Qanat Islam da bar.
