Erteń keıbir óńirlerde aýa temperatýrasy 45 gradýsqa deıin tómendeıdi

  ASTANA. KAZINFORM – Qazgıdromet elimizdiń 12 óńirinde kún raıyna baılanysty eskertý jasady.

Sınoptıkterdiń boljamynsha, 17 qańtarda Almaty oblysynyń soltústiginde jáne taýly aımaqtarynda aýa temperatýrasy –25 gradýsqa deıin tómendeıdi. Qonaev qalasynda soltústik-batystan soltústik-shyǵysqa aýysatyn jel kúsheıip, ekpini keı ýaqytta sekýndyna 18 metrge jetpek. Almatyda túngi ýaqytta qalyń qar jaýýy múmkin.

Aqtóbe oblysynyń ońtústigi men batysynda túnde qar jaýady. Al soltústik, shyǵys jáne ortalyq bóliginde jaıaý burqasyn bolady. Jel shyǵystan jáne soltústik-shyǵystan soǵyp, ekpini 15–20 m/s, túnde keı jerlerde 23 m/s-qa deıin jetedi. Aqtóbe qalasynda da túngi ýaqytta jel kúsheıýi yqtımal.

Mańǵystaý oblysynda qar jaýyp, kóktaıǵaq bolady. Túnde oblystyń ońtústiginde qalyń qar jaýady. Soltústik-shyǵysta jaıaý burqasyn, al batysy men ortalyǵynda tuman túsýi yqtımal. Aqtaýda kóktaıǵaq bolady.

Túrkistan oblysynyń batysynda, soltústiginde jáne taýly aımaqtarynda jaıaý burqasyn soǵady. Túrkistan qalasynda jańbyr men qar aralas jaýyn-shashyn, kóktaıǵaq, tuman jáne burqasyn boljanyp otyr. Shymkentte de osyndaı aýa raıy saqtalyp, túnde jaýyn-shashyn kúsheıedi.

17–18 qańtar kúnderi túnde Shyǵys Qazaqstan oblysynyń soltústigi men shyǵysynda asa qatty aıaz kútiledi – aýa temperatýrasy –45 gradýsqa deıin tómendeıdi.

Jetisý oblysynyń soltústiginde, ortalyǵynda jáne taýly aýdandarynda túnde –25…–27 gradýs aıaz bolady. Taldyqorǵanda kóktaıǵaq, túngi temperatýra –25…–26 gradýsqa deıin tómendeıdi.

Abaı oblysynyń ońtústik-batysy men ortalyǵynda jel kúsheıip, ekpini 15–20 m/s bolady. Al túnde oblystyń soltústiginde aıaz –40 gradýsqa deıin jetedi.

Ulytaý oblysynyń ońtústigi men ortalyǵynda tuman túsedi. Jel soltústik-shyǵystan jáne shyǵystan soǵyp, ekpini 15–20 m/s-qa jetedi. Jezqazǵanda da túngi jáne tańǵy ýaqytta jel kúsheıedi.

Qyzylorda oblysynyń ońtústiginde qar, boran jáne kóktaıǵaq bolady. Jel ekpini keı jerlerde 23 m/s-qa deıin jetýi múmkin. Qyzylorda qalasynda da jel kúsheıýi yqtımal.

Qaraǵandy oblysynyń soltústiginde, shyǵysynda jáne ońtústiginde tuman túsedi. Túnde soltústik-shyǵysynda aıaz –35…–38 gradýsqa deıin tómendeıdi.

Batys Qazaqstan oblysynda 17 qańtarda shyǵys jáne soltústik-shyǵys baǵyttaǵy jel túnde kúsheıip, ekpini 15–20 m/s bolady.

Atyraý oblysynyń batysynda, ońtústiginde jáne shyǵysynda qar, jaıaý burqasyn men kóktaıǵaq bolady. Shyǵysynda tuman túsýi múmkin. Atyraý qalasynda da qar jaýyp, jeldiń ekpini 15–18 m/s-qa jetedi.

Sınoptıkterdiń boljamyna sáıkes, aldaǵy demalys kúnderi Qazaqstannyń soltústigi men shyǵysynda aıaz kúsheıip, batysy men ońtústiginde qar men boran, jeldiń kúsheıýi jáne kóktaıǵaq saqtalady.

Osyǵan deıin Almatyda aýa raıyna baılanysty birneshe reıs keshigip jatqany týraly jazdyq.