Erteń Qazaqstannyń basym bóliginde aýa raıy jaýyn-shashyndy bolady
ASTANA. 2 maýsym. QazAqparat - Respýblıka aýmaǵynyń basym bóligi tsıklonnyń jáne onymen baılanysty atmosferalyq aǵynnyń áserinde qalyp otyr, sonyń saldarynan aýa raıy jaýyn-shashyndy bolyp, kún kúrkirep, qatty jel turýda. Jekelegen aýdandarda burshaq jaýýy múmkin.
Respýblıkanyń batys óńirleri antıtsıklonnyń áserinde bolady, ol jaqta jaýyn-shashynsyz aýa raıy kútilýde, dep habarlaıdy Qazgıdromet.
Al Aqmola, Jambyl, Ońtústik Qazaqstan, Atyraý, Aqtóbe, Pavlodar oblystarynda, kúndiz Almaty, Batys Qazaqstan oblystarynda 15-22 metr/sekýnd jyldamdyqta jel turady. Qostanaı, Soltústik Qazaqstan, Qaraǵandy, Shyǵys Qazaqstan oblystarynyń keı aýdandarynda da 15-22 metr/sekýnd jyldamdyqpen jel soǵady, burshaq jaýýy yqtımal. Qyzylorda oblysynyń keı jerlerinde jeldiń ekpini 15-20 metr/sekýnd jyldamdyqqa deıin kúsheıedi dep kútilýde. Mańǵystaý oblysynyń keı aýdandarynda da 15-20 metr/sekýnd jyldamdyqpen jel turady, túnde jáne tańerteń jaǵalaýda tuman bolady.
Eldiń batysy men ońtústiginde barynsha órt qaýpi saqtalýda.
