Erteń Qazaqstanǵa qysqa merzimge TMD mıssııasynan baıqaýshylar toby keledi - O. Kýleba

ASTANA. QazAqparat - Erteń Qazaqstanǵa qysqa merzimge Táýelsiz Memleketter Dostastyǵy mıssııasynan baıqaýshylar toby keledi. Bul týraly búgin QR OSK brıfınginde TMD atynan kelgen baıqaýshylar shtaby basshysynyń orynbasary Oleg Kýleba málim etti.

«Erteń qysqa merzimge baıqaýshylar kele bastaıdy. Akkredıtatsııalyq kýálikti alǵannan keıin olar Qazaqstannyń óńirlerine jol tartady. Biz Qazaqstannyń barlyq aımaqtaryna baramyz, bul saılaýdaǵy tolyq kartınany baǵamdaýǵa múmkindik beredi», - dep atap ótti ol.

Onyń aıtýynsha, uzaqmerzimdi baqylaýshylar saılaý aldynda bolyp jatqan oqıǵalar men úderisterge jiti monıtorıng jasap keledi. Qazirgi ýaqytta olar kúndelikti saılaý organdarynyń basshylyqtarymen kezdesýler ótkizýde.

«Ol kezdesýlerde saılaý protsesine qatysyp jatqan tulǵalardan kelip túsken shaǵymdar men ótinishter talqylanady», - dedi O. Kýleba.