Qazaqstanda 29 qazan – Jalpyulttyq aza tutý kúni
29 qazan Qazaqstan Respýblıkasynda Jalpyulttyq aza tutý kúni bolyp jarııalandy, Kazinform bul týraly Aqordaǵa silteme jasap habarlaıdy.
«Qaraǵandy oblysyndaǵy I.A. Kostenko atyndaǵy shahtada bolǵan avarııa saldarynan adamdardyń qaza bolýyna baılanysty Qazaqstan Respýblıkasynda 2023 jylǵy 29 qazanda jalpyulttyq aza tutý jarııalansyn», - delingen Prezıdent Qasym-Jomart Toqaevtyń Ókiminde.
Búgin kúndiz Qasym-Jomart Toqaev Kostenko shahtasyndaǵy qaıǵyly oqıǵa saldarynan qaza tapqan kenshilerdiń otbasylarymen jáne týǵan-týystarymen kezdesýde 29 qazandy Jalpyulttyq aza tutý kúni dep jarııalaıtynyn aıtqan bolatyn.
Eske salaıyq, búgin túnde Qaraǵandy oblysyndaǵy Kostenko atyndaǵy shahtada órt boldy. Saǵat 17.33-tegi málimet boıynsha 33 kenshiniń denesi tabyldy,13 adam izdestirilip jatyr.
Keshqurym brıfıng ótkizgen Tótenshe jaǵdaılar mınıstri Syrym Sháriphanov jer astynda qalǵan kenshilerdi tiri tabýǵa úmit óte az ekenin málim etti.
Kásibı áskerılendirilgen apattyq-qutqarý qyzmetteriniń respýblıkalyq ortalyq shtaby Qaraǵandy fılıaly dırektorynyń orynbasary Jumat Ókenov mert bolǵan kenshilerdiń jeke basyn anyqtaý qıynǵa túsip jatqanyn aıtty.
29 qazan Jalpyulttyq aza tutý kúni bolyp jarııalandy.
Memleket basshysy Qasym-Jomart Toqaev Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.
