Erteń Qazaqstanda memlekettik basqarý júıesin túbegeıli jańǵyrtý bastalady — Toqaev
ASTANA. KAZINFORM — Erteń memlekettik basqarý júıesin túbegeıli jańǵyrtý jumysy resmı túrde bastaý alady. Muny kezekti ákimshilik reforma dep túsinýge bolmaıdy. Bul týraly Memleket basshysy Qasym-Jomart Toqaev Parlament palatalarynyń sońǵy birlesken otyrysynda aıtty.
— Bárińizge belgili, erteń memlekettik basqarý júıesin túbegeıli jańǵyrtý jumysy resmı túrde bastaý alady. Muny kezekti ákimshilik reforma dep túsinýge bolmaıdy. Sebebi, bul — elimiz úshin múlde jańa tarıhı kezeń bastalady, ıaǵnı maqsaty da, maǵynasy da múlde bólek, buryn-sońdy bolmaǵan ózgerister iske asady degen sóz. Basqasha aıtsaq, biz qazaq memlekettiginiń «ǵımaratyna» kúrdeli jóndeý júrgizýdi kózdep otyrmyz, — dedi Q. Toqaev.
Prezıdent el Táýelsizdiginiń myzǵymas tuǵyry men irgetasyn kózdiń qarashyǵyndaı saqtap, memlekettik basqarý júıesin jetildire túsý qajet ekenin eske saldy.
— Bul — asa mańyzdy mindet. Oǵan memlekettik qyzmette, akademııalyq ınstıtýtta, ǵylymı jáne saıası zertteýler ortalyqtarynda, úkimettik emes sektorda, halyqaralyq uıymdarda qyzmet etetin, osy iske qatysy bar azamattardyń barlyǵy atsalysýy qajet, — dedi ol.
Byltyrǵy Joldaýynda Memleket basshysy Qazaqstandy úsh jylda damyǵan tsıfrlyq memleketke aınaldyrý jóninde mindet qoıǵan edi. Elimizdiń keleshegi osy maqsattyń qalaı iske asyrylatynyna baılanysty.
— Biz Qazaqstannyń Táýelsizdigi men Egemendigin senimdi túrde qorǵaý máselesin áli túbegeıli sheshken joqpyz. Muny eshqashan esten shyǵarmaıyq. «Jaý joq deme jar astynda» degen támsildi árqashan qaperde ustaǵan jón. Bizdiń basty muratymyz — halyqtyń ál-aýqatyn arttyryp, qaýipsizdigin qamtamasyz etý, azamattardyń turmys sapasyn jaqsartý. Bul kórsetkishterdi udaıy kóterip, osy úrdisti úzdiksiz jalǵastyra berýimiz qajet. Sondyqtan bizdiń mundaı kezde qol qýsyryp otyrýǵa quqymyz joq. Aldymyzda turǵan asa aýqymdy ári kúrdeli mindetterdi tabysty júzege asyrý úshin tabandy, nátıjeli eńbek etýimiz kerek, — dedi Qasym-Jomart Toqaev.
Eske salsaq, bıyl 1 qyrkúıekten bastap jańa Parlament — Quryltaı óz jumysyna kirisedi.
Ata zańnyń 94-babyna sáıkes, Respýblıkalyq referendýmda qabyldanǵan Qazaqstan Respýblıkasynyń Konstıtýtsııasy 2026 jylǵy 1 shildeden bastap kúshine enedi, buǵan deıin qabyldanǵan Qazaqstan Respýblıkasy Konstıtýtsııasynyń qoldanysy sol mezgilden bastap toqtatylady. Respýblıkalyq referendýmda Konstıtýtsııa qabyldanǵan kún memlekettik mereke — Qazaqstan Respýblıkasynyń Konstıtýtsııasy kúni dep jarııalanady.
Naqtyraq aıtqanda, jańa Konstıtýtsııanyń 95-babynda 1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes qalyptastyrylǵan Qazaqstan Respýblıkasynyń Parlamenti óz ókilettigin 2026 jylǵy 1 shildeden bastap toqtatatyny jazylǵan.
Al Konstıtýtsııa kúshine engen kúnnen bastap bir aı ishinde Qazaqstan Respýblıkasynyń Prezıdenti Quryltaı saılaýyn jarııalaıdy jáne ol eki aı ishinde ótkiziledi. Birinshi shaqyrylǵan Quryltaıdyń birinshi sessııasy ashylǵan kúnnen bastap eki aı ishinde Qazaqstan Respýblıkasynyń Prezıdenti Quryltaıdyń kelisimimen Vıtse-Prezıdentti taǵaıyndaýǵa tıis.
