Erteń "Qazaqstan ǵarysh sapary" Ulttyq kompanııasy mamandary Frantsııaǵa oýǵa attanady
ALMATY. 17 qańtar. QazAqparat /Názıra Eleýhan/ - Búgin Almatyda "Qazaqstan ǵarysh sapary" Ulttyq kompanııasy mamandaryn Frantsııaǵa "EADS" atty asa iri Eýropa kontserniniń kásiporyndaryna bilimderin jetildirý úshin oqýǵa shyǵaryp salý rásimi boldy. Bul kompanııa mamandarynyń shet elge bilim alýǵa baratyn alǵashqy toby.
Frantsııaǵa birneshe baıqaý men irikteýden ótken, "júzden júırik, myńnan tulpar" shyqqan, 200 úmitkerden iriktelingen 24 maman barmaq. Onyń quramynda - álemniń mártebeli JOO-da tehnıkalyq bilim alǵan, aǵylshyn tilin múltiksiz meńgergen ınjenerler, menedjerler bar, tórteýi - tehnıka ǵylymynyń kandıdaty, ekeýi ǵylym magıstri.
Ǵarysh tehnologııasynyń arnaıy konstrýktorlyq- tehnıkalyq bıýrosynyń dırektory Sergeı Mýrýshkınniń aıtýynsha, mamandar eki jyl oqıdy. "Biz bul kúnge uzaq daıyndaldyq jáne kúttik. Mamandardy irikteý jumystary bir jyldan astam ýaqyt júrgizildi. Qatal irikteýden ótken mamandar eldiń, bizdiń úmitimizdi aqtap, aldyǵa qoıylǵan mindetti abyroımen atqarady dep senemiz. Bilimderine bilim qosyp, erteń ózderi spýtnık jasaı alatyn dárejege jetetinderine úmitimiz zor",-dedi ol.
"Qazaqstan ǵarysh sapary" AQ-nyń prezıdenti Ǵabdýllatıf Myrzaqulovtyń aıtýynsha, mamandardy oqytýǵa úlken qarajat bólingen. "Ol shyǵyndar ózin-ózi aqtaıdy. Óıtkeni, Frantsııaǵa attanatyn jastar Qazaqstanda birinshi bolyp jańa ǵarysh tehnologııalaryn ıgeretin jáne elimizde engizetin bolady. Erteń Astanada salynyp jatqan "Ǵarysh" qalashyǵynda osy mamandar jumys istep, ǵarysh salasyn damytatyn bolady",-dep atap ótti ol.
Onyń aıtýynsha, Frantsııaǵa bilim alýǵa baratyn 21 mamannnan turatyn ekinshi top bıylǵy jyldyń shilde aıynda jiberilmek.
Ǵabdýllatıf Myrzaqulovtyń aıtýynsha Eýropa elderinde Frantsııanyń "EADS" kompanııasy - ǵaryshtyq tehnıkalar men zymyrandar shyǵaratyn eń iri jáne Eýropadaǵy eń birinshi ǵaryshtyq kompanııa bolyp tabylǵandyqtan jáne álemdegi ekinshi iri kompanııa bolyp tabylǵandyqtan tańdap alynyp otyr.
Ǵarysh tehnıkasynyń bolashaq qazaqstandyq konstrýktorlarynyń, synaqshy-ınjenerleriniń birinshi toby Almatydan Frantsııaǵa erteń, 18 qańtarda attanady.
Mamandardyń bilimderin jetildirý Qazaqstan men Frantsııanyń ǵarysh salasyndaǵy strategııalyq áriptestiginiń negizinde jasalǵan eki iri kólemdi joba aıasynda iske asyrylmaq.
Esterińizge sala ketsek, 2009 jyly qazan aıynda elimizge Frantsııa Prezıdenti Nıkolıa Sarkozıdiń memlekettik saparynyń aıasynda ǵarysh apparatyn qurastyrý-synaý keshenin jasaý, Jerdi qashyqtyqtan zondtaý ǵarysh júıesi, tehnologııalardy transfertteý jáne Qazaqstannyń ǵarysh salasy úshin mamandar daıarlaýdy kózdeıtin birikken eki aýqymdy ǵarysh jobasyn iske asyrýǵa arnalǵan kelisimge qol qoıylǵan bolatyn.
Shara sońynda saparǵa attanýshy mamandarǵa Talǵat Musabaev jaıynda jazylǵan kitap pen kádesyılyqtar syıǵa tartyldy.
