Erteń qasıetti Ramazan aıy bastalady
ASTANA. 19 shilde. QazAqparat - Erteń qasıetti Ramazan aıy bastalady. Búgin osyǵan oraı elordadaǵy «Nur Astana» meshitiniń bas ımamy Qalıjan Zańqoev BAQ ókilderimen baspasóz máslıhatyn ótkizdi.
Osydan birneshe jyl buryn Ramazan aıynyń qarsańynda baspasóz máslıhatyn ótkizý bylaı tursyn, orazanyń da, qadir túniniń de eleýsiz ótkendigin atap ótken ol: «Bıyl Ramazan aıy qudaı qalasa, qasıetti jumaǵa týra kelip otyr. Búgin keshke taraýıh namazyn oqyp, bastaımyz. Taraýıh namazy - súnnát. Taraýıh namazyn keshki quptan namazy ýaqytynda, saǵat 11-lerde bastap, túngi 1-1.30-ǵa deıin ótkizemiz», - dedi.
Onyń atap ótýinshe, osy túni eldimizdiń búkil meshitterinde qatym qurany oqylady. Ol jaıynda Baqara súresiniń 185-shi aıatynda: «Ramazan - adamdarǵa týra jol nusqaýshy, aq pen qarany aıyrýshy, bekem tutynatyn jolbasshy retinde Quran túsirile bastaǵan aı. Ramazan aıy týǵanyn kórgen adam birden oraza ustaıtyn bolsyn. Eger bireýler aýrý bolyp, áıtpese jol saparda júrse, onda basqa kúnderde ótesin. Alla senderge jeńildik bolýyn qalaıdy, aýyrlyq túsirgisi kelmeıdi», - delingen.
Qazaqstan Musylmandar dinı basqarmasynyń pátýa bólimi bergen málimetke sáıkes, aǵymdaǵy jyly Ramazan aıy 20 shilde aıynda bastalyp, 18 tamyzda aıaqtalady.
