Erteń «Jibek joly» týrıstik poıyzy jolǵa shyǵady
ASTANA. KAZINFORM — Erteń «Jibek joly» týrıstik poıyzy jolǵa shyǵyp, Ortalyq Azııany toǵystyratyn biregeı transshekaralyq saıahat bastalmaq.
Joba aıasynda Qazaqstan, Ózbekstan jáne Tájikstan bir marshrýtqa biriktirildi. Bıylǵy basty jańalyq — baǵyttyń alǵash ret Tájikstan astanasy Dýshanbe qalasyna deıin keńeıýi. Bul óz kezeginde tarıhı qalalardy jalǵaıtyn mádenı kópirge aınalmaq.
— Marshrýt Almatydan bastalyp, Túrkistan, Samarqan, Dýshanbe jáne Tashkentti qamtıdy. Jolaýshylarǵa arnaıy ekskýrsııalar, kásibı gıdterdiń súıemeldeýi jáne tolyq týrıstik qyzmetter usynylady, — dedi «Jolaýshylar tasymaly» AQ marketıng bóliminiń bas menedjeri Saıan Nurtazın Jibek Joly telearnasynyń «Búgin Live» baǵdarlamasynda.
Joba alǵash ret 2024 jyly júzege asyp, sol ýaqyttan beri suranysqa ıe bola bastady.
— Joba bastalǵaly poıyz 11 ret saparǵa shyqty. 3000-nan astam jolaýshy qamtyldy, — dedi «Jolaýshylar tasymaly» AQ marketıng jónindegi bas menedjeri Danııar Qabyljanov.
Mamandardyń aıtýynsha, mundaı bastama óńirdegi týrızmniń damýyna tyń serpin beredi. Ótken jyly Ortalyq Azııa elderine 25 mıllıonnan astam týrıst kelgenin eskersek, jańa joba kórsetkishtiń artýyna yqpal etýi múmkin.
Bıylǵy maýsymda týrıstik poıyzben 500-den astam jolaýshy saparǵa shyǵýdy josparlap otyr. Onyń uzaqtyǵy — 6 kún.
— Barlyq detal eskerildi. Poıyz otandyq óndiristen shyqqan, 2023-2025 jyldary shyǵarylǵan «ZIKSTO» zaýytynyń zamanaýı vagondary paıdalanylady. Barlyǵy ulttyq naqyshta bezendiriledi. Jolaýshylar úshin barlyq jaǵdaı jasalǵan, ınternet te qoljetimdi, — deıdi mamandar.
Uıymdastyrýshylardyń aıtýynsha, baǵa da barynsha yńǵaıly deńgeıde belgilengen.
— Jolserikter qazaq, orys jáne aǵylshyn tilderin meńgergen. Bılet quny –eresekter úshin 300 myń teńge, balalarǵa 250 myń teńge. Oǵan qonaqúıde turý men ekskýrsııalyq qyzmetter tolyq kiredi, — dedi Saıan Nurtazın.
Mundaı týrıstik poıyzdar Eýropa elderinde keńinen qoldanysta. Endi osy tájirıbe Ortalyq Azııada da júıeli túrde jetildiriledi dep josparlanǵan.
Aıta keteıik, jaqynda Memleket basshysy Qasym-Jomart Toqaev týrıstik sala men balalar sportyn qoldaý týraly zańǵa qol qoıdy.