12 túrli eldiń mádenıeti men ónerin kórsetýge tyrysamyz - Silk Way Star qatysýshysy
ASTANA. KAZINFORM – Qazaqstan Astanasy Silk Way Star mega jobasynyń qatysýshylaryn áli de tańǵaldyryp keledi. Bul týraly álemdik dodada Tájikstan namysyn qorǵaıtyn Fahrıddın Hakımov Jibek Joly arnasyndaǵy «BúginLive» baǵdarlamasyna bergen suhbatynda aıtty.
– Eń aldymen, Qazaqstan astanasynyń tazalyǵy tańdaı qaqtyrady ári Ortalyq Azııaǵa ǵana tán arhıtektýralyq ǵımaratty kózdiń jaýyn alady, - deıdi ol.
Tájik ánshisi Fahrıddın Hakımov Silk Way Star jobasyna deıin kóptegen halyqaralyq jarysta top jaryp úlgergen. Óziniń keń dıapozonymen tyńdarmandarynyń júregine jol sala bilgen dara ártis. Biraq, Silk Way Star mega jobasynyń aýqymy bólek, áleýeti joǵary ekenin aıtty.
– Men 12 memlekettiń ónerpazdaryn biriktirgen aýqymdy jobaǵa alǵash ret qatysyp otyrmyn. Men úshin bul - zor mártebe. Óz elimniń namysyn qorǵaý maǵan júktelgen zor jaýapkershilik dep bilemin. Bul Ortalyq Azııada alǵash ret uıymdastyrylyp otyrǵan shoý dep oılaımyn. Sebebi bul jerde sahnanyń syrtynda kún-tún demeı eńbek etip júrgen qanshama adamnyń mańdaı teri bar, - deıdi Fahrıddın Hakımov.
Sonymen qatar ol «BúginLive» baǵdarlamasy arqyly barsha telekórermenderge úndeý jasady.
– Qurmetti kóziqaraqty kórermen! Jibek Joly arnasy arqyly ózińizdiń kóńilińiz qalaǵan qatysýshyǵa daýys berip, bizdi qoldaýǵa shaqyramyn. Biz qolymyzdan kelgenshe 12 túrli eldiń mádenıeti men ónerin kórsetýge tyrysamyz. Sebebi, sizderdiń qoldaýlaryńyz ártister úshin óte mańyzdy jáne ol bizge shabyt beredi, - dedi ol.
Tájikstandyq meıman jobanyń túsirilim jumystarynyń deńgeıin de joǵary baǵalady. Sahnanyń kórkemdigi, mýzykalyq apparatýra barlyǵy qatysýshylardyń kóńilinen shyqqan. Eń bastysy, osy alań arqyly tyń týyndylar men jańa ıdeıalar týyndap jatqanyn alǵa tartty.
Aıtpaqshy, erteń saǵat 20:00-de Jibek Joly arnasynda SILK WAY STAR mega jobasynyń alǵashqy shyǵarylymy kórermen nazaryna usynylady.
Eske salaıyq, buǵan deıin Silk Way Star jobasynyń anonsy QTJ ǵımaratynyń ekranynan kórsetilgeni týraly jazǵan bolatynbyz.