Erteń estafetalyq synǵa túsetin jigitterge sáttilik tileımin - Elena Hrýstaleva
ATY. 5 aqpan. QazAqparat /Erlik Erjanuly/ -Bıatlonnan erler arasyndaǵy erteńgi estafetalyq synǵa aldyn ala boljam jasaı almaımyn.
Biraq komandalastarymynyń jeńisine úmitim zo, - deıdi 7-Qysqy Azııa oıyndarynyń chempıony Elena Hrýstaleva. Búgin Soldat saıdaǵy shańǵy-bıatlon stadıonynda áıelder arasynda 4h6 shaqyrymdyq estafetalyq jarysta Marına Lebedova, Olga Poltoranına jáne Inna Mojevıtınamen birge ol bıatlonnan qurama qorjynyna tórtinshi altyn medal salǵan bolatyn.
«Qysqy Azııa oıyndaryna biz uzaq boıy ýaqyt tyńǵylyqty daıyndyq jasadyq. Buǵan deıingi syndardan aıtarlyqtaı joǵary deńgeıde ótken bul dúbirli dodada eńbegimiz aqtaldy. Bıatlonshylar qurama qorjynyna qazirdiń ózinde 4 altyn, 1 kúmis, 2 qola medal qostyq», - deıdi Elena Hrýstaleva. Onyń aıtýynsha, keshegi 15 shaqyrymdyq jekeleı synǵa qaraǵanda estafeta birshama jeńil bolǵan. Oǵan komandalas qurbylarynyń estafetany ózge qarsylastarynan birshama erte tabys etýi óz septigin tıgizgen. Sonyń arqasynda shepke esh alańsyz jetken. Bul nysanany dál kózdeýge óz kómegin tıgizdi. Al keshe jarystyń sońyna deıin kúresýge májbúr bolǵan.
«Azııa oıyndaryndaǵy nátıjeme kóńilim tolady. Bul jarystan keıin azdap demalǵan soń daıyndyqqa qaıta kirisemin. Alda - Álem chempıonaty. Ázirge bul básekedegi óz maqsatym týraly esh nárse aıtqym kelmeıdi», - deıdi Vankýverdegi qysqy Olımpıadanyń kúmis júldegeri Elena Hrýstaleva.
