Erteń elordada toǵyzqumalaqtan tuńǵysh Álem chempıonaty bastalady

Búgin Týrızm jáne sport mınıstrliginde baspasóz ókilderimen ótken máslıhatta Sport komıteti tóraǵasynyń orynbasary Málik Sapashev, tarıhta tuńǵysh ret ótkeli otyrǵan toǵyzqumalaqtan álem chempıonaty Astanada joǵary deńgeıde ótkiziletinine senim bildirdi. Onyń aıtýynsha, chempıonatqa Ázirbaıjan, Germanııa, Ispanııa, Qazaqstan, Qyrǵyzstan, Qytaı, Ózbekstan, Grýzııa, Mońǵolııa, Túrkııa, Túrikmenstan, Reseı, Ýkraına, Chehııa, Shveıtsarııadan 50-ge jýyq sportshy qatysady. Chempıonat erler jáne áıelder arasynda ótkizilip, 4 altyn medal sarapqa salynbaq.

Qazaqstan atynan Ǵ.Temirbaev pen A.Seıtjanov, D.Kenına, Á.Dalıeva, S.Saparbekova syndy halyqaralyq dárejedegi sport sheberleri óner kórsetedi.

«Búgingi kúni toǵyzqumalaqtan elimizde 100 myńdaı adam shuǵyldanady. Sonyń ishinde 36 myń bala sport mektepteriniń toǵyzqumalaq úıirmelerine qatysýda. Sońǵy eki jyl ishinde Anglııa, Amerıka, Chehııa, Túrkııa, Qytaı elderinde toǵyzqumalaqtan halyqaralyq týrnırler ótti»,-deıdi M. Sapashev.

Halyqaralyq jáne Qazaqstan Respýblıkasynyń Toǵyzqumalaq qaýymdastyqtarynyń tóraǵasy Álıhan Báımenovtiń aıtýynsha, jarystyń bir apta aıasynda Halyqaralyq qaýymdastyqtyń múshelerimen kelissóz júrgizip, kelesi birinshiliktiń orny anyqtalatyn bolady.

«Sońǵy bes-alty jylda toǵyzqumalaq jańa serpinmen damyp kele jatyr. 2007 jyldan bastap bıýdjettik qarjylandyrý 10 esege deıin ósken. El reıtingisinde birinshi orynda turǵan Ásel Dálıeva men Aıdos Seıitjanov memlekettik shákirtaqy alady. Memleket deńgeıinde ǵana emes, alys-jaqyn shetelde de úgit-nasıhat, ádistemelik jumystar jasalýda. Álemde ulttyq zııatkerlik oıyndarynyń álemdik birinshiligin ótkizetin 10-ǵa tarta halyq bar. Sol ondyqtyń ishine toǵyzqumalaq ta enip otyr», - dep atap kórsetti ol.

«Keleshekte álemniń túkpir-túkpirinen bizdiń oıynshlarymyzǵa edáýir kúshti qarsylyq kórsete alatyn toǵyzqumalaqshylar shyǵatynyna úmittenemiz. Qazirgi ýaqytta Qazaqstan oıynshylary Álem boıynsha eń myqty oıynshylar ekeni daýsyz», dep túıindedi sózin qaýymdastyq basshysy.

Qazirgi ýaqytta toǵyzqumalaqtyń elektrondy nusqasynda oınaýǵa múmkindik beretin http://www.iggamecenter.com/ saıty ashylǵan. Ony kanadalyq azamat Artı Sandler qurǵan.

Toǵyzqumalaq alty ret 2006 jyly - Londonda, 2007, 2008, 2009 jáne 2010 jyldary - Praga men Pardýbıtsede (Chehııa), 2010 j. - Kannda (Frantsııa) dúnıejúzilik zııatkerlik olımpıada men festıvalderdiń baǵdarlamasyna endi. 2007 jyly Makedonııada ótken Túrki tildes jastar quryltaıynda 40 elden kelgen 240 delegatqa ulttyq oıynnan semınar ótkizildi.