Erteń elimizde «Densaýlyq sabaǵy - 2011» ótkiziledi
ASTANA. 31 tamyz. QazAqparat. Qazaqstan Respýblıkasy Densaýlyq saqtaý mınıstrliginiń bastamasymen elimizdiń barlyq mektepterinde 1 qyrkúıek kúni «Densaýlyǵyńdy kútýge daǵdylan!» uranymen «Densaýlyq sabaǵy - 2011» ótkiziledi. Bul shara balalar men jasóspirimderge arnalǵan naǵyz Densaýlyq merekesi bolmaq,
dep habarlaıdy Densaýlyq saqtaý mınıstrliginiń baspasóz qyzmeti.
El damýynyń «Qazaqstan-2030» uzaq merzimdik strategııasynyń basym baǵyttarynyń biri óskeleń urpaqtyń densaýlyǵy, bilim alýy men ıgilikteri bolyp tabylady. El halqynyń densaýlyǵyn nyǵaıtý úshin mektep qabyrǵasynan bastap salaýatty ómir salty mádenıetin qalyptastyrý, qaýipti minez-qulyq faktorlaryna qarsy tura alatyndaı ómirlik daǵdylardy boıyna sińirý óte mańyzdy.
Qazaqstan táýelsizdiginiń 20 jyldyǵy aıasynda densaýlyq sabaǵynyń basty taqyryby retinde salaýatty ómir salty mádenıetiniń túrli aspektileri tańdalady: belsendi dene qımyly, sportpen aınalysý, durys tamaqtaný, zııandy ádetterge qarsy tura bilý, turmysta jáne jolda júrgende qaýipsiz minez-qulyqtyń bolýy.
Bul merekeni búkil el boıynsha ótkizýdi QR Bilim jáne ǵylym mınıstrligi, QR Týrızm jáne sport mınıstrligi, oblystardyń, Astana men Almaty qalalarynyń ákimdikteri qoldady.
«Densaýlyq sabaǵynyń» ashylý saltanaty 1 qyrkúıekte saǵat 10.00-de ótkiziledi, oǵan qoǵam qaıratkerleri, ataqty sportshylar, ǵylymı-zertteý ınstıtýttarynyń jáne medıtsınalyq joǵary oqý oryndarynyń dırektorlary, Densaýlyq saqtaý basqarmalarynyń, medıtsına mekemeleriniń, salaýatty ómir saltyn qalyptastyrý qyzmetiniń basshylary qatysady.
Elimizdiń jalpy bilim beretin mektepterinde densaýlyqty saqtaý men nyǵaıtýdyń, temeki shekpeýdiń, araq-sharap ishpeýdiń, esirtki tutynbaýdyń, durys tamaqtanýdyń mańyzy jónindegi máseleler týraly aqparattyq-aǵartý materıaldary berilgen densaýlyq jónindegi qabyrǵa gazetteri rásimdelgen.
«Densaýlyq sabaǵy» aıasynda mektep jasyndaǵy balalar densaýlyǵynyń ózekti máseleleri, salaýatty ómir saltyn ustanýdyń, qaýipsiz minez-qulyq daǵdalaryn qalyptastyrýdyń jáne aýrýdyń aldyn alýdyń mańyzy týraly beınerolıkter men fılmder kórsetiledi.
Bul is-shara oqýshylarǵa salaýatty ómir saltynyń negizgi aspektileri boıynsha aqparat alýǵa múmkindik beredi jáne densaýlyqty bala kezden saqtaý men nyǵaıtý úshin salaýatty ómir saltyn ustanyp, kóp qımyldaý jáne sportpen aınalysýdyń mańyzyn, adamnyń óz densaýlyǵy úshin jaýapkershilikte yntymaqtas bolý qajettigin kórsetedi.
