Erteń elimiz boıynsha «Ózińniń qan qysymyńdy bile júr» aktsııasy ótedi
ALMATY. 16 mamyr. QazAqparat /Ádilet Musahaev/ - Erteń elimizde «Ózińniń qan qysymyńdy bile júr» aktsııasy ótedi, onda tilek bildirgenderdiń bári medıtsına mekemeleri men halyq kóp jınalatyn oryndarda óziniń arterıaldyq qysymyn ólsheı alady.
Bul jaıynda búgin Almatyda ótken arnaıy baspasóz máslıhatynda "Salaýatty ómir saltyn qalyptastyrý problemalary" Ulttyq ortalyǵynyń dırektory Sáýle Dıqanbaeva málim etti.
Atalǵan sharaǵa kelýshilerdiń qan qysymy joǵary ekendigi anyqtalǵan jaǵdaıda mamandardyń keńesin ala alady. Aktsııa «Gedeon Rıhter» jáne «Nıkomed» kompanııalarynyń qoldaýymen ótkizilmek.
Medıtsına mamandary Dúnıejúzilik gıpertonııamen kúres kúnine oraılastyrylyp otyrǵan aktsııa turǵyndardyń óz densaýlyǵyna nazar aýdarýyna septigin tıgizedi dep esepteıdi.
«Arterıaldyq qysymy joǵary adamdardyń 50 paıyzy óziniń aýyratyny týraly bilmeıtini anyqtaldy. Bastyń jıi aýyrýy gıpertonııanyń belgisi bolýy múmkin, biraq oǵan kóbinese kóńil aýdýrylmaıdy nemese kádimgi sharshaǵandyqtyń belgisindeı seziledi. Arterıaldyq gıpertonııamen jas adamdar da kóp syrqattanatyn boldy. Onymen syrqattanýdyń kóbeıýine temeki shegý, araq-sharapty shamadan tys kóp qoldaný, deneniń artyq salmaǵy, durys tamaqtanbaý, az qımyldaý, kúızeliske túsý sııaqty qaýipti faktorlar da yqpal etedi», - deıdi Almaty qalasy densaýlyq saqtaý basqarmasynyń bas kardıology Jámıla Aldabekova.
Gıpertonııa aýrýynan emdelýdiń tabysty bolýy dárigerdiń kómegine júginý jáne dárilik preparattar qoldanýmen qatar kóp jaǵdaılarda adamnyń óz densaýlyǵyna degen jaýapkershiligine de baılanysty bolady eken. Aýrýdyń aldyn alý úshin ár adam arterıaldyq qysymyn júıeli túrde baqylaýy, salaýatty ómir saltyn ustanýy, temeki shekpeýi, kókónister men jemisterdi kóbirek jeýi, maıly jáne tuzdy taǵamdardy az paıdalanýy, araq-sharapty ishpeýi tıis. Mamandardyń aıtýynsha, arterıaldyq gıpertonııanyń aldyn alýda júıeli túrde skrınıngtik tekserýden ótýdiń mańyzy zor, onyń aýqymyna qaýiptilik faktorlaryn baǵalaý, mindetti túrde arterıaldyq qysymdy ólsheý jáne zerthanalyq zertteýler júrgizý kiredi.
