Erteń eldiń ońtústigi men batysynda órt qaýpi joǵary bolady - 12 mamyrǵa arnalǵan aýa raıy boljamy
ASTANA. 11 mamyr. QazAqparat - 12 mamyr kúni Qazaqstan óńirleriniń deninde antıtsıklonnyń yqpalymen shýaqty kún raıy kútilýde, ońtústikte jáne shyǵysta jel soǵady, dep habarlady Qazgıdrometke silteme jasap, QR TJM-nen.
Batys aýmaǵynyń jekelegen aýdandarynda kún ystyq bolady dep shamalanýda.
Almaty, Jambyl, Ońtústik Qazaqstan, Pavlodar oblystarynda keıbir jerlerde 15-20 m/s jyldamdyqpen jel soǵady, jekelegen aýdandarda shańdy daýyl bolady.
Soltústik Qazaqstan oblysynda túnde jáne tańerteń keıbir jerlerde tuman túsýi yqtımal.
Atyraý oblysynda kún qatty ystyq bolady.
Eldiń ońtústigi men batysynyń jekelegen jerlerinde órt qaýpi joǵary bolady dep kútilýde.
Aldaǵy úsh táýlikte respýblıkanyń ońtústik, ońtústik-shyǵys jáne shyǵysynda sý kóleminiń aýytqýlary kútiledi, Almaty oblysynyń jekelegen taýly ózenderinde sý deńgeıi kóteriledi.
