Erteń Ázirbaıjan astanasy Bakýde bokstan álem chempıonaty bastalady
ASTANA. 24 qyrkúıek. QazAqparat - AIBA basshylyǵynyń habarlaýynsha, álem chempıonatyna qatysý úshin 127 eldiń 685 bylǵary qolǵap sheberleri ótinish bergen.
Qazirgi ýaqytta Ázirbaıjanǵa Qazaqstan, Kenııa, Ýganda, Kýba, Meksıka, AQSh, Qytaı, Tájikstan, Úndistan, Tájikstan, Ózbekstan, Bolgarııa, Grýzııa, Germanııa, Vengrııa, Irlandııa, Polsha, Reseı, Túrkııa, Ýkraına, Belarýs jáne Avstrııa boksshylary keldi.
Geıdar Álıev atyndaǵy sport-kórme kesheninde 26 qyrkúıek pen 8 qazan aralyǵynda ótetin baıraqty báseke barysynda London olımpıadasynyń lıtsenzııalary sarapqa salynady. Chempıonattyń saltanatty ashylýy 25 qyrkúıekke josparlanyp otyr.
Aıta keteıik, 22 qyrkúıek kúni bokstan Qazaqstan quramasy Bakýge attanyp ketken bolatyn. Álem chempıonatyna qatysatyn komanda quramyn ulttyq quramanyń bapkerler keńesi aıqyndady. Qazaqstandyq sportshylar 9 salmaq dárejesinde el namysyn qorǵaıdy. Atap aıtqanda, Birjan Jaqypov (49 keli), Oljas Sáttibaev (52), Ǵanı Jaılaýov (60), Danııar Eleýsinov (64), Serik Sápıev (69), Danabek Sýjanov (75), Ádilbek Nııazymbetov (81), Vasılıı Levıt (91), Ivan Dychko (+91) sharshy alańǵa kóteriledi.
Esterińizge sala keteıik, 54 keli salmaq dárejesinde óner kórsetetin Qanat Ábýtálipov 27-28 mamyr kúnderi Qytaıdyń Gýıjoý qalasynda ótken Búkilálemdik boks serııasynyń jekeleı chempıonatynda jeńimpaz atanyp, Búkilálemdik boks serııasy reıtıngindegi eń úzdik boksshy dep tanylǵan bolatyn. Sóıtip, ol London Olımpıadasynyń joldamasyn ıelengen-di.
