Erteń Astanada jańa meshit ashylady
ASTANA. QazAqparat - Erteń Ramazan aıy qarsańynda Astanada jańa meshit ashylady. Bul týraly búgin baspasóz máslıhatynda Qazaqstan musylmandary dinı basqarmasynyń Astana qalasy boıynsha ókili, «Nur Astana» meshitiniń bas ımamy Naýryzbaı qajy Ótpenov málim etti.
«Osy Ramazan aıynyń qarsańynda, Inshalla, elordada taǵy bir Allanyń úıi ashylǵaly otyr. Alla qalasa, Astanada jańadan turǵyzylǵan Allanyń úıi, meshitimiz 27 maýsym kúni halyqqa esigin ashpaq. Alla taǵala meshittiń ashylýyn qutty etsin, jamaǵatpen bezendirsin, halqyma birlik bersin», - dep atap ótti ol.
Meshit qalanyń shetinde, áýejaıǵa barar jolda Qabanbaı batyr kóshesiniń qıylysynda ornalasqan. Atalǵan meshit 1 myńǵa tarta jamaǵatty syıdyrady.
«Onda er kisilerge jeke jáne áıel kisilerge jeke namaz oqıtyn zaldary bar. Meshitke ataý berý jónindegi másele qarastyrylýda. Qazaqstan musylmandary dinı basqarmasy ózi bekitip, eldiń usynysyna saı at beredi. Onyń ashylýyna Qazaqstannyń Bas múftıi Erjan qajy Malǵajyuly kelip, resmı túrde tusaýyn kesedi. Qazirgi ýaqytta Astanada 7 meshit bar. Erteń, Alla jazsa, taǵy bireýi qatarymyzǵa qosylady», - dedi N.Ótpenov.
Eske sala keteıik, bir aıǵa jalǵasatyn ulyq mereke - Ramazan aıy bıyl 28 maýsymda bastalady. 27 maýsym kúni elordadaǵy barlyq meshitterde Taraýyq namazy oqylady.
