Erteń Astanada qoǵam jáne memleket qaıratkeri Smaǵul Sádýaqasuly máıitiniń kúlin jerleý rásimi ótedi
ASTANA. 19 mamyr. QazAqparat - Erteń, 20 mamyr, qasıetti juma kúni, saǵat 10-30-da Astrahan tas jolynyń boıyndaǵy musylmandar zıratynda qoǵam jáne memleket qaıratkeri, jazýshy, qazaq teatrynyń negizin qalaýshylardyń biri,
ulttyq teatrtanýdaǵy alǵashqy eńbekterdiń avtory Smaǵul Sádýaqasuly (1900-1933) máıitiniń kúlin jerleý rásimi ótedi. Ult zııalylarynyń, Parlament depýtattarynyń qatysýymen mıtıngi bolady.
Týǵan Otanynda musylmandyq jerleý rásimimen máńgilik jer qoınyna tapsyrylǵan Smaǵul Sádýaqasulynyń rýhyna baǵyshtalyp quran oqylady.
Aıta ketý kerek, 2011 jyly 21 qańtarda asa kórnekti memleket jáne qoǵam qaıratkeri, bizdiń dańqty jerlesimiz Smaǵul Sadýaqasuly súıeginiń kúli Máskeýdiń Don zırathanasynan Astanaǵa jetkizilgen bolatyn. Ol Astana qalasyndaǵy S.Ǵylmanı meshitinde ýaqytsha saqtaýǵa qoıyldy.
