Erteń Astanada halyqtyq serýen ótedi
ASTANA. 4 qazan. QazAqparat - Erteń Astanada Kásipodaq qyzmetkeriniń kúnin merekeleýge oraı halyqtyq serýen ótedi. Bul týraly astana.kz saıtyna QR Kásipodaqtar federatsııasynan habarlady.
Іs-shara aıasynda, jármeńkeler, sporttyq jarystar uıymdastyrylyp, ártister óz ónerlerin ortaǵa salady, lotereıa bıletteri oınatylady. Budan basqa, kásipodaq qyzmetindegi belsendi delegattar úshin QR Eńbek jáne halyqty áleýmettik qorǵaý mınıstrligi men «Atameken» ulttyq ekonomıkalyq palata basshylarynyń qatysýymen dóńgelek ústel ótkizilip, yntymaqtastyq týraly memorandýmǵa qol qoıylady. Kásipodaqtar kúnin merekeleýge respýblıkamyzdyń barlyq aımaqtarynan kelgen oblystyq jáne salalyq kásipodaqtardyń ókilderi - delegattar qatysady. Bul ataýly kúndi aýqymdy merekeleýdiń maqsaty - Kásipodaqtar federatsııasy qyzmetiniń jańa formatta júzege asyrylatynyn málim etý. Aldaǵy ýaqytta Federatsııa qyzmetinde birqatar ózgerister oryn alady. Qazirgi ýaqytta Qazaqstanda respýblıkalyq deńgeıde 26 salalyq jáne aımaqtarda 14 oblystyq kásipodaq jumys isteıdi. Kásipodaqtar federatsııasyna 2,1 mln jýyq adam engen. Sonyń ishinde 1,1 mln bilim jáne medıtsına salasynda qyzmet etse, 5 myńy stýdentter men zeınetkerler. Kásipodaqtardyń qalǵan músheleri ekonomıka sektorynyń qyzmetkerleri. Resmı statıstıkalyq málimetterge sáıkes, jaldamaly jumyskerlerdiń sany 5,8 mln adamdy quraıdy. Sonyń ishinde 30% kásipodaqtar quramyna kirgen. Eske salaıyq, 10 qazan - Kásipodaq qyzmetkeriniń kúni.
