Erteń Astanada dzıýdodan halyqaralyq Grand Slam jarysy bastalady

ASTANA. KAZINFORM — Bedeldi týrnırge álemniń 49 elinen 400-den astam dzıýdoshy qatysady. Olardyń qatarynda Olımpıada jáne álem chempıondary bar. Bul týraly Týrızm jáne sport mınıstrligi málim etti. 

El astanasyna qazirdiń ózinde eki dúrkin Olımpıada chempıony Takanorı Nagase (Japonııa), Rıo-2016 jeńimpazy Rafaela Sılva (Brazılııa), Parıj Olımpıadasynyń chempıony Beatrız Soýza (Brazılııa) jáne otandasymyz, Parıj Olımpıadasynyń qola júldegeri Ǵusman Qyrǵyzbaev jáne basqa da juldyzdar keldi. Bul týrnır — álemdik dzıýdo arenasyndaǵy eń joǵary dárejeli jarystardyń biri.

— Erejege sáıkes, jarysty qabyldaýshy el ár salmaqta tórt sportshyǵa deıin qatystyra alady. Bul jas sportshylardyń tájirıbe jınaqtaýyna jáne IJF álemdik reıtınginde mańyzdy upaılar enshileýine jol ashady, — delingen habarlamada.

Týrnırge Eldos Smetov bul joly qurmetti qonaq retinde qatysady. 

Jankúıerler qazaq sportyndaǵy ańyz tulǵamen júzdesip, estelikke sýretke túse alady.

Grand Slam jeńimpazdaryna — 1000, kúmis júldegerge — 700, al qola medal ıegerine 500 reıtıngtik upaı beriledi. Bul upaılar Olımpıada joldamasyna talas jolyndaǵy sheshýshi mánge ıe.

Atalǵan jarys — Halyqaralyq dzıýdo federatsııasynyń kúntizbesindegi álem chempıonatyna deıingi sońǵy iri týrnır. Ulttyq quramanyń bapkerleri sportshylardyń daıyndyǵyn osy synda naqty baǵalaı alady.

Jarystar Jaqsylyq Úshkempirov atyndaǵy Jekpe-jek saraıynda ótedi jáne Qazsport telearnasynan tikeleı efırde kórsetiledi. Kirý — tegin. 

Buǵan deıin habarlanǵandaı, dzıýdodan Qazaqstan ulttyq quramasy elordada ashyq jattyǵý ótkizdi.