Erteń Astanada balabaqshaǵa 300-den astam joldama beriledi

ASTANA. QazAqparat - 2 qazanda № 95 «Almaty balabaqshasy» (Almaty k, 4) jáne № 54 «Nur-aı» (Qarqabat k, 15) balabaqshalaryna elektrondy joldama berý bastalady, dep habarlaıdy QazAqparat elorda ákimdiginiń resmı saıtyna silteme jasap.

Óz ýaqytynda qujat tapsyrǵan ata-analar jáne oryn alǵandarǵa sms-habarlama keledi. Balabaqshaǵa beriletin joldamany anasy nemese ákesi ETsQ-kilti arqyly E.ASTANA.KZ saıty arqyly alady. Joldama qazaq jáne orys toptaryna beriledi.

Aıta keteıik, joǵaryda kórsetilgen balabaqshadaǵy oryndy úsh kúnniń ishinde (2, 3 jáne 4 qazanda) tańdaýǵa bolady. 5 qazan tańerteńnen bastap suranys bolmaǵan oryndar qoljetimdi bos oryndarǵa júkteledi, ıaǵnı ony kelesi kezektegiler alady.

Astanalyq bilim basqarmasy astana turǵyndaryna elektrondy kezekke qoıý týraly suraqtar boıynsha konsýltatsııa kúnderi bolatynyn taǵy da eske salady. Ol ár sársenbide saǵat 9-dan 18.00-ge deıin barlyq mektepke deıingi mekemelerde ótedi. Tolyq aqparatty myna telefondar arqyly alýǵa bolady: 55-68-73, 55-68-83.

Aıta keteıik, 2017 jyldan bastap 55 myń oryn elektrondy júıe arqyly berildi.