Erteń Almatydan «Jeńis poıyzy» jolǵa shyǵady
ASTANA. 6 jeltoqsan. QazAqparat - 7 jeltoqsanda Almatyda «Jeńis poıyzy» jolǵa shyǵady. Bul shara Reseıdiń Rjev qalasynda qazaqstandyq 100-shi jáne 101-shi atqyshtar brıgadasynyń jaýyngerlerine arnalǵan memorıaldyq eskertkishtiń ashylýy aıasynda ótkizilip otyr, dep habarlady Qazaqstannyń Reseıdegi elshiliginen.
Eskertkish Jeńistiń 65 jyldyq mereıtoıyn toılaý aıasynda Qazaqstan Prezıdenti Nursultan Nazarbaevtyń tapsyrmasyna sáıkes turǵyzylǵan bolatyn. «Jeńis poıyzy» aktsııasyna qatysýshylardyń arasynda Uly Otan soǵysynyń ardagerleri, qaza bolǵan jaýyngerlerdiń týǵan-týystary, ardagerler men jastardyń jáne basqa da qoǵamdyq uıymdardyń ókilderi bar. Poıyzdyń joly atalǵan atqyshtar brıgadasy jasaqtalǵan qalalar - Almaty jáne Aqtóbe qalalary arqyly, Qazaqstannyń Taraz, Shymkent, Qyzylorda, Oral sııaqty oblys ortalyqtary jáne Reseıdiń elordasy -Máskeý qalasy arqyly ótip, Rjevke barady.
Qazaqstannyń Reseıdegi elshiligi bastamasha bolyp otyrǵan bul aktsııa «Nur Otan» jáne «Birtutas Reseı» partııalarynyń qamqorlyǵymen, «Qazaqstan temir joly» jáne «Reseı temir joly» kompanııalarynyń qoldaýymen ótkeli otyr.
Barlyq úlken stansalarda saltanatty jıyndar, kezdesýler ótedi, óner ujymdary kontsert qoıady. Rjevtegi Memorıal 12 jeltoqsanda ashylady.
100- jáne 101- jeke atqyshtar brıgadalary 1942-1943 jyldary Tver oblysynyń aýmaǵynda «Mars» operatsııasynyń barysynda bolǵan jaýyngerlik sharalarǵa belsendi atsalysqan. Sol shaıqastarda qazaqstandyq jaýyngerlerdiń 80 paıyzy jer qushqan.
