Erteń Almatyda Jubanovtar áýleti týraly derekti fılmniń tusaýkeser rásimi ótedi
ALMATY. 18 mamyr. QazAqparat /Ádilet Musahaev/ - Erteń Ál-Farabı atyndaǵy QazUÝ jýrnalıstıka fakýltetiniń T. Qojakeev atyndaǵy akt zalynda fılologııa ǵylymdarynyń kandıdaty, televızııalyq jáne radıojýrnalıstıka kafedrasynyń dotsenti Jıdegúl Ábdijádilqyzynyń «Ulylardyń urpaǵy» atty Jubanovtar áýleti týraly derekti fılminiń tusaýkeser rásimi bolady.
Fılm aıasynda qazaqtyń tuńǵysh kásibı mýzykanty, ónertaný salasyndaǵy alǵashqy akademık Ahmet Jubanov, Qazaqstannyń eńbek sińirgen óner qaıratkeri, kompozıtor Ǵazıza Jubanova, tehnıka ǵylymdarynyń doktory, professor Qaıyr Ahmetuly Jubanov, bıologııa ǵylymdarynyń doktory, professor Ajar Ahmetqyzy Jubanova, til bilimi salasyndaǵy alǵashqy qazaq professory, túrkitanýshy, pedagog Qudaıbergen Qýanuly Jubanov jaıly derekter usynylady.
Fılmniń tusaýkeser rásimin televızııalyq jáne radıojýrnalıstıka kafedrasy men M.Barmanqulov atyndaǵy QazUÝ teleradıokesheni birlesip ótkizedi.
Sondaı-aq atalǵan sharaǵa ýnıversıtettiń jýrnalıstıka, tarıh, fılologııa fakýltetteriniń professor-oqytýshylar quramy men arnaıy shaqyrylǵan qonaqtar qatysady.
Shara aıasynda qazaq eliniń óner órisi men bilim kókjıegindegi, ǵylym aıasyndaǵy Jubanovtar áýletinen taraǵan urpaqtyń qaldyrǵan qoltańbasy men qosqan úlesi, sonymen qatar, Ahmet Jubanov atyndaǵy daryndy balalarǵa arnalǵan qazaq orta mamandandyrylǵan mýzyka mektep-ınternatynyń álemdik deńgeıdegi jetistikteri baıandalady.
