Erteń Almatyda TMD kóleminde alǵash ret eń úlken qaıyrymdylyq bal ótedi
dep habarlaıdy QazAqparat.
«Saltanatty keshti 96-y juptan turatyn qyz-jigitter ashady. Biz olardy 2000 talapkerden iriktep aldyq. Satylǵan bıletten túsken qarjyny Almaty qalasynyń №1-shi jetim balalar úıi men Shelek aýdanyndaǵy sábıler úıine jáne múgedek balalar qoryna aýdaramyz. Almaty jáne Shelekte eki fızıoterapııalyq kabınet qaıta jabdyqtalady», dedi sharanyń uıymdastyrýshysy, «Eventica» kompanııasynyń bas dırektory Marat Omarov.
Buǵan deıin habarlaǵanymyzdaı, saltanatty shara qarasha aıynyń 21-i kúni Almaty Towers kesheninde ótedi. Balǵa bas-aıaǵy 2000-nan astam adam qatysady. Olardyń ishinde elimizge tanymal iskerler qaýymdastyǵynyń ókilderi, saıasatkerler, ǵylym men mádenıet qaıratkerlerimen qosa, Reseıdiń teatr, kıno juldyzdary Elena Korıkova, Lıýdmıla Artemeva, Andreı Chernyshov, Tatıana Arngolts, Ivan Jıdkov keledi. Alǵash ret sahnada belgili reseılik dırıjer Artýr Orenbýrgskııdiń basqarýymen 150 adamnan turatyn eki orkestr - Memlekettik sımfonııalyq orkestr jáne Estradalyq sımfonııalyq orkestr óner kórsetedi. Baldyń qurmetti komıtet músheligine QR Syrtqy ister mınıstriniń orynbasary Nurtaı Ábiqaev, Mádenıet jáne aqparat mınıstriniń orynbasary Asqar Bóribaev, Almaty qalasynyń ákimi Ahmetjan Esimov jáne halyq ártisi Jánııa Áýbákirova engen.
Balǵa qatysamyn degen kez kelgen adamǵa esik ashyq. Kirý bıletiniń quny 10 myńnan 65 myń teńgege deıin turady.