Erteń Almatyda «Birligimiz jarasqan» ulttyq syılyǵynyń jeńimpazdary marapattalady
Bul týraly syılyq quryltaıshylary málim etti.
Kúndelikti jasap júrgen qyzmetterimen, jasaǵan erlikterimen, qoǵam men eldiń damýyna, azamattardyń boıyna patrıottyq sezimderdi uıalatýǵa súbeli úlesterin qosyp júrgen qarapaıym tulǵalardy atap ótý ıdeıasy - Qazaqstannyń Azamattyq Alıansy, Qoǵamdyq saıasatty damytý ınstıtýty, «Jasyl el» QB, «Úı» meıirimdilik qoǵamy, Qazaqstannyń Іsker áıelderi qaýymdastyǵy, KTK jáne «Habar» telearnalaryna tıesili.
Syılyqqa nomınanttardy usyný byltyrǵy jyldyń qazan aıynda bastaldy. Jobaǵa barlyǵy 200-den astam ótinim usynylyp, olar birneshe irikteýden ótti.
Syılyqtyń qoǵamdyq keńesi quramynda mádenıet, óner jáne qoǵam qaıratkerleri - Ákim Tarazı, Bıbigúl Tólegenova, Roza Rymbaeva, Aıman Musaqojaeva, Seıtqazy Mataev, Raýshan Sarsenbaeva, Alekseı Lomakınder bar.
Ústimizdegi jyldyń 15 aqpanynda qoǵamdyq keńes músheleri syılyqtyń 10 laýreatyn tańdap aldy. Biraq marapattaý rásimine deıin olardyń esimderin qupııa saqtaýdy jón kórdi. Uıymdastyrýshylardyń aıtýynsha, aqtyq dodaǵa jetken 20 azamattyń qalǵan 10-y da qurmet pen marapattan shet qalmaıdy.
«Barlyq nomınanttarǵa syılyqqa qatysqany úshin dıplomdar jiberiletin bolady. Múmkindik bolsa, árbireýin shaqyrar edik. Desek te, meniń oıymsha, qoǵamdyq komıtet aldaryna qoıylǵan mindetterdi tolyǵymen atqara aldy, marapattaý rásimi kezinde úzdikterdiń úzdigi atalatyn bolady!», - deıdi Qoǵamdyq saıasatty damytý ınstıtýtynyń dırektory, «Birligimiz jarasqan!» syılyǵyn uıymdastyrýshylardyń biri Sholpan Baıbolova.
Saltanatty sharada Roza Rymbaeva, Tolqyn Zabırova, Aqjol Meıirbekov, Búrkit, «Rıngo», «Orda» toptary jáne basqa da juldyzdar án men bıden shashý shashpaq.
