Erteń Almaty oblysynda dabyl qaǵylady
TALDYQORǴAN. QazAqparat - 20 aqpanda Almaty oblysy aýmaǵynda dabyl qaǵylady. Osylaısha oblystyq tótenshe jaǵdaılar departamenti qyzmetkerleri turǵyndardy qulaqtandyrý júıesiniń jumysyn teksermek, dep habarlaıdy QazAqparat tilshisi.
Oblystyq TJD baspasóz qyzmetiniń málimetinshe, 20 aqpan kúni kúndizgi saǵat 12:55-te oblys aýmaǵynda elektr dabyldar 30 sekýndqa qosylady. Mamandar oblys turǵyndaryn qulaqtandyrý júıesine tehnıkalyq tekseris júrgizedi. Osyǵan oraı oblystyq TJD qyzmetkerleri halyqty alańdamaı, túsinistikpen qaraýǵa shaqyrady. Sondaı-aq qutqarýshylar oblys aýmaǵynda tótenshe jaǵdaı bolǵanda elektrodabyldardyń qosylý kezinde ne isteý kerektigin eskertip otyr.
«Eger dabyl kezinde úıde bolsańyz radıo jáne teledıdardy qosyńyz, shuǵyl habardy tyńdańyz, berilgen habarlamaǵa sáıkes áreket etińiz», - dep TJD mamandary keńes beredi.
Al eger dabyl kezinde dalada bolǵan jaǵdaıda, kóshedegi daýys ulǵaıtqyshtarmen nemese jyljymaly habarlaý quraldarymen beriletin shuǵyl habarlamany tyńdap áreket etý qajettigin eske salady.
