Erte kásiptik daıarlyq boıynsha pılottyq joba 2 myń oqýshyny qamtydy

ASTANA. KAZINFORM — 2023-2024 oqý jylynan bastap Qazaqstanda joǵary synyp oqýshylaryna jumysshy mamandyǵy biliktiligin berý boıynsha pılottyq joba iske asyrylyp jatyr. Bul týraly Oqý-aǵartý mınıstrliginiń baspasóz qyzmeti habarlady.

Elimizdiń 17 óńirinde iske qosylǵan joba kadrlar daıarlaýǵa kózdelgen jergilikti bıýdjet esebinen qarjylandyrylady. Bastama mekteptiń bilim berý júıesiniń praktıkalyq baǵytyn kúsheıtýge jáne jastardyń jumysqa erte ornalasýyna múmkindik jasaýǵa baǵyttalǵan.

— Kásiptik daıarlyq kolledjder bazasynda, al jalpy bilim berý pánderin meńgerý mektepterde ótedi. 11-synypty bitirgennen keıin oqýshylar attestat qana emes, orta tehnıkalyq bilim týraly dıplom da alady, — deıdi Tehnıkalyq jáne kásiptik bilim departamentiniń dırektory Áset Muhanbetov.

Pılottyq jobaǵa 150-ge jýyq kolledj men mektep qatysyp jatyr. Joǵary synyp oqýshylary eńbek naryǵy úshin qajetti baǵyttar boıynsha bilim alady, onyń ishinde tamaqtanýdy uıymdastyrý, avtokólikke tehnıkalyq qyzmet kórsetý jáne jóndeý, tigin óndirisi jáne kıimdi modeldeý, kıim dızaıny, grafıkalyq jáne mýltımedııalyq dızaın, dánekerleý isi, jıhaz óndirisi, shashtaraz qyzmeti qamtylǵan.

Búgingi tańda jobaǵa 2 myńǵa jýyq oqýshy qatysýda. Bıyl 905 túlek kásibı biliktilikpen qatar eńbek naryǵyna birden shyǵý múmkindigin alyp, kolledj dıplomyn alady.

Joba tehnıkalyq jáne kásiptik bilim berý júıesin transformatsııalaýǵa, ekonomıkanyń naqty sektorynyń qajettilikterine baǵdarlanǵan básekege qabiletti adamı kapıtaldy qalyptastyrýǵa arnalǵan memlekettik strategııalyq baǵyt sheńberinde iske asyrylýda.

Aıta ketelik Memleket basshysy Qasym-Jomart Toqaev kásibı tehnıkalyq kolledjder jańa mamandyqtarǵa suranysty eskerýge tıis ekenin aıtqan edi.