Erte qartaıýdyń sebepteri
ASTANA. QazAqparat - Óz jasymyzdan egde kórinbeý úshin terini jasartatyn túrli kremder jaǵyp, betimizge kóptegen maskalar jasap jatamyz. Sulýlyq ekpelerin egip, basqa da kosmetologııalyq sıqyrlarǵa júginetinimiz jasyryn emes. Osylaısha, betimizdegi «kárilikten» qutylǵymyz keledi. Dese de, keıbir ádetterimizben ózimiz qartaıýǵa qaraı qadam jasap jatqanymyzdy eskere bermeımiz. Nazarlaryńyzǵa qartaıýdyń negizgi sebepterin usynamyz, dep jazady anabol.kz.
1. Iyqty tik ustamaý.
Iyqty tik ustap, keýde men ıekti kóterińkirep júrý - bet bulshyq etteriniń salbyrap, moıynǵa erte ájim túsýiniń aldyn alatyn qarapaıym ereje.
2. Sýdyń jetispeýi.
Shaı, kofe, gazdalǵan sýsyndardyń eshqaısysy da aǵzadaǵy suıyqtyqty tepe-teńdikte ustap turý protsessine qatyspaıdy. Sondyqtan da kúndelikti tańerteń ash qarynǵa eki stakan sý iship turýdy ádetke aınaldyryńyz. Tamaq aldynda sý ishý óte paıdaly.
3. Az uıyqtaý saldary.
Durys uıyqtamaý, uıqynyń qanbaýy, sonymen qatar túngi ýaqytta uıyqtamaý kóńil-kúıimizge ǵana emes, densaýlyǵymyzǵa da mol áserin tıgizedi. Túnde kollagen belsendi túrde túziledi. Al kollagenniń jetispeýshiligi teriniń eki ese tez qartaıýyna sebepker bolady.
4. Qabaqtyń túıilýi.
Únemi áldenege kóńili tolmaı júrýi adamnyń betinen-aq bilinip turady. Qabaqtyń túıilýi, kóńil-kúıdiń bolmaýy, renish pen ókpe bet bulshyq etterin tyrystyryp, bet terisine ájim túsirip qana qoımaı, kárilik syzyqtarynyń barynsha ulǵaıa túsýine sebepker bolady.
5. Uzaq ýaqyt tapjylmaı otyrý.
Jumysta kún uzaq kompıýter aldynda, al keshke úıge kelgende teledıdar aldynda tapjylmaı otyrý adamdy tezirek qartaıtyp, kóptegen aýrýlarǵa ákep soqtyrady. Sondyqtan kóbirek qozǵalýǵa, keńsede aýyq-aýyq dene jattyǵýlaryn jasap turýǵa ádettenińiz.
6. Bettegi makııajdy jýmaı uıyqtaý.
Jýylmaǵan tonaldi krem teridegi usaq tesikterdi bitep, túrli qabynýlarǵa sebepker bolady. Al kóz boıaýlary qabaqtyń, kózdiń aınalasyndaǵy juqa teriniń erte qartaıyp, qurǵap, ájimdenip ketýine qolaıly jaǵdaı týǵyzady. Týsh kirpikti synǵysh etedi.
7. Tuz ben qantqa qumarlyq.
Qant degende - ol sizdiń shaıǵa qosqan eki shaqpaǵyńyz ǵana emes, kúndelikti tutynatyn as mázirińizdiń barlyǵynda derlik belgili mólsherde qant bar. Dál sol sııaqty tuz da taǵamdardyń bárinde kezdesedi.
8. Artyq tamaqtaný.
Tamaqty «Ákem úshin bir qasyq», «Anam úshin bir qasyq» dep jeý balalyq shaqta qalǵanymen, ol ádet boıymyzda áli bardaı kórinedi. Ózimiz toısaq ta, kózimiz qımaı, baıqaýsyzda artyq jep qoıamyz. Mundaı jaman ádetten arylý kerek. Artyq taǵamdy qorytý úshin aǵzaǵa mol kúsh túsedi. Bul da óz kezeginde qartaıýǵa bir qadam jaqyndata túspek.
