Erte dıagnostıkalaý arqyly týa bitken kemistikten bolatyn balalar múgedektigi 7,5%-ǵa tómendegen

ASTANA. KAZINFORM – Memleket basshysynyń tapsyrmasy boıynsha Úkimet profılaktıkalyq medıtsına men erte dıagnostıkany damytýǵa erekshe nazar aýdarady, bul balalardyń múgedektigin azaıtýǵa jáne jańa týǵan nárestelerdiń aman qalý kórsetkishin arttyrýǵa yqpal etedi.

Elimizde aýytqýlardy erte anyqtaý úshin tıimdi ınfraqurylym qalyptastyryldy – bir kúndik klınıkalar, uryqty qorǵaý ortalyqtary ashyldy. Balalarǵa týǵannan bastap skrınıngtiń tórt túri júrgiziledi: neonataldy, aýdıologııalyq, psıhofızıkalyq jáne oftalmologııalyq. Bul jumys nátıjesin berdi – týa bitken aqaýlary bar balalar arasyndaǵy bastapqy múgedektik 7,5%-ǵa tómendedi, al jańa týǵandardyń ómir súrý deńgeıi 88%-dan 93%-ǵa deıin artty. 

Balalarǵa kórsetiletin kómekti jaqsartý úshin árbir AMSK uıymynda pedıatrııalyq bólimder uıymdastyrylýda. ıÝNISEF qoldaýymen emhanalarda Balalardy damytý jáne erte aralasý ortalyqtary ashylyp jatyr. Búginde osyndaı 100 ortalyq jumys isteıdi, onda damýynda qıyndyqtary bar balalar keshendi kómek alady. Balalar arasynda aýtızm dıagnozy qoıylǵandar sanynyń kóbeıýine baılanysty olardyń reabılıtatsııasyna arnalǵan tósek-oryn sany 4 esege artty.

Analardy qoldaý úshin alǵash ret áıelderdiń reprodýktıvtik densaýlyǵyn nyǵaıtýǵa baǵyttalǵan «Analar saýlyǵy» baǵdarlamasy iske qosyldy. Sonymen qatar shalǵaı aýyldardaǵy áıelder úshin joǵary qaýip tobyndaǵy júkti áıelderdi aldyn ala gospıtalızatsııalaýǵa arnalǵan «Salaýatty ana» pansıonattary ashylyp jatyr.

Buǵan deıin habarlanǵandaı, profılaktıkalyq skrınıngter memleket kepildik bergen medıtsınalyq qyzmetter paketine engizildi.