Ertaevty túrmeden bosatqan sýdıa jazalana ma
ALMATY. KAZINFORM — Joǵarǵy sot «Bank RBK-niń burynǵy basshysy Jomart Ertaevty qamaýdan bosatý týraly qaýlynyń kúshin joıý zańǵa qaıshy ma?» degen suraqqa túsinik berdi.
Eks-bankır qyrkúıek aıynyń basynda raqymshylyqqa ilinip, bostandyqqa shyqqan edi. Alaıda keıin Almaty oblystyq soty bul sheshimniń kúshin joıdy. Sot mundaı sheshimge jaza merzimin esepteýde ketken qateler men protsessýaldyq sáıkessizdikter sebep bolǵanyn túsindirdi.
Agenttik tilshisi osy jaǵdaıǵa baılanysty Joǵarǵy sotqa resmı saýal joldap, «Ertaevty bosatqan sýdıa tártiptik jaýapqa tartylýy múmkin be?» degen suraq qoıdy.
— QR «Sot júıesi jáne sýdıalardyń mártebesi týraly» Konstıtýtsııalyq zańynyń normalaryna sáıkes, sot aktisin ózgertý nemese kúshin joıýdyń ózi zań buzý bolyp eseptelmeıdi. Eger joǵary turǵan sot satysy tarapynan zańdy óreskel buzý faktisi anyqtalmasa, sýdıa jaýapkershilikke tartylmaıdy, — delingen jaýapta.
Eske salaıyq, Jomart Ertaev 2018 jylǵy mamyrda Máskeýde Qazaqstan ІІM Interpol ulttyq ortalyq bıýrosynyń suraýy boıynsha ustalǵan. Ol asa iri kólemdegi alaıaqtyq jasady degen kúdikpen halyqaralyq izdeýde bolǵan.
2019 jylǵy naýryzda ol Reseı Federatsııasynan Qazaqstanǵa ekstradıtsııalandy.
Tergeý dereginshe, Ertaev 2011-2017 jyldary qyzmettik ókiletin paıdalanyp, aldyn ala sóz baılasqan tulǵalarmen birge «Bank RBK» AQ-nan 144 mlrd teńge jymqyrdy degen kúdikke ilindi. Bul iske barlyǵy 54 adam tartylyp, olardyń qatarynda 41 top-menedjer men bank qyzmetkerleri bolǵan.
2020 jylǵy qarashada Almaty soty Jomart Ertaevty 11 jylǵa bas bostandyǵynan aıyrdy.