Ersultan Bekturǵanov: Áleýmettik bastama - bolashaqqa degen talpynys

ALMATY. QazAqparat - QR Parlamenti Májilisiniń depýtaty, Halyqaralyq ister, qorǵanys jáne qaýipsizdik komıtetiniń múshesi Ersultan Bekturǵanov «Prezıdenttiń bes áleýmettik bastamasy» ekonomıkalyq ósim arqyly halyqtyń ál-aýqatyn arttyrýǵa baǵyttalǵanyn aıtty, dep habarlaıdy QazAqparat tilshisi.

«Prezıdenttiń bes áleýmettik bastamasy halyqtyń ál-aýqatyn ekonomıkalyq jaǵynan jaqsartýǵa baǵyttalǵan. Álemdik daǵdarys dáýirinde tipti Eýropanyń damyǵan elderi halqyna mundaı múmkindik jasaı bermeıdi. Atap aıtqanda, «7-20-25» baǵdarlamasy ár jumysshyǵa búgingideı 14-16 emes, 7 paıyzben qazirgi kezdegideı 10-15 jylǵa emes, 25 jylǵa ıpotekaǵa baspana ala alady.  Jáne bastapqy jarna baspa qunynyń 20 paıyzynan aspaýy kerek. Bul elimizde qurylys alańdaryn kóbeıtip, ondaǵan ózge salalardyń damýyna serpin beredi, bos jumys ornyn kóbeıtedi.  Bul baǵdarlama halqymyzdyń demografııalyq ósýine jol ashyp, halyqtyń kóshi-qonyn azaıtady. Qazaqstanǵa kóship kelgisi keletinderdiń qataryn arttyrady», - dedi Bekturǵanov.

Elbasy bes áleýmettik bastamasynda 2019 jyldyń 1 qańtarynan bastap jumysshylardyń salyq júktemesin 10 esege azaıtyp, 1 protsent qana salyq salýdy usynǵan bolatyn. Elbasy aı saıyn eń tómengi eseptik kórsetkishtiń 25 eselengen kóleminen az jalaqy alatyndarǵa salynatyn jeke tabys salyǵyn azaıtý arqyly olardyń salyq júktemesin jeńildetý kerektigin aıtty.

«Elbasy jańǵyrýdyń negizi bolyp sanalatyn adam kapıtalyna qashanda erekshe mán berip keledi. Kelesi oqý jylynan bastap, 20 myń oqý grantyn, onyń 11-in tehnıkalyq mamandyqtarǵa baǵyttaý elimizde óndiristik tsıfrly dáýirdiń bastalaýyna negiz bolady. Stýdentterge 2022 jyldyń sońyna deıin jataqhanalar salý bastamasy myńdaǵan stýdent pen oqýshylardyń qoldaýyna ıe boldy», - dedi E.Bekturǵanov.

Májilis depýtatynyń pikirinshe, Elbasy bastamasyndaǵy 5-shi baǵyt boıynsha Qazaqstannyń ortalyǵyn gazben qamtý Jezqazǵan, Qaraǵandy oblysy boıynsha Temirtaý jáne Astana qalalarynyń ekologııalyq máselesin keshendi túrde sheshýge jol ashady. Sondaı-aq, ekonomıkamyzdyń birneshe salasynyń damýyna serpin berip, azyq-túlik baǵasynyń arzandaýyna, agroóndiris kesheniniń dmaýyna, onyń ishinde jylyjaı sharýashylyǵynyń órkendeýine septigin tıgizbek.

«Elbasy Úkimetke atalǵan máselelerdi bir jyl, ary ketkende 1,5 jyl ishinde sheshýge tapsyrma berdi. Álbette, Memleket basshysy kótergen bastamalardy oryndaýǵa zańnamalyq tuǵyr kerek. Bizder, depýtattar Prezıdenttiń bes áleýmettik bastamasyn júzege asyrý úshin jasalatyn zań jobalaryn talqylaýǵa kirisemiz. Áleýmettik bastamalar bolashaqqa degen talpynys», - dedi Májilis depýtaty.