Ersaıyn Naǵaspaev Astana qalasy ákiminiń orynbasary bolyp taǵaıyndaldy
Bul týraly qala ákiminiń resmı saıtynda jazyldy.
32 jastaǵy Ersaıyn Naǵaspaev joǵary bilimdi, Bóketov atyndaǵy Qaraǵandy memlekettik ýnıversıtetin «Halyqaralyq ekonomıkalyq qatynastar» mamandyǵy boıynsha támamdady.
Memlekettik qyzmetti - 2001 jyldan beri. Eńbek jolyn Temirtaý qalasy ákiminiń apparatynda bastady. QR Syrtqy ister, kólik jáne kommýnıkatsııa mınıstrlikterinde túrli qyzmetterdi atqardy. Vıtse-premerdiń keńesshisi boldy. «Aqtaý halyqaralyq porty» RMK-da jumys istedi, Qaraǵandy qalasy Qazybek bı atyndaǵy aýdan ákiminiń orynbasary, Qaraǵandy oblysy ákiminiń keńesshisi boldy. Bul taǵaıyndaýǵa deıin Shahtınsk qalasynyń ákimi laýazymyn atqardy.
E.Naǵaspaev Astana qalasy ákiminiń orynbasary retinde qarjylyq jáne ekonomıkalyq, bıýdjettik jáne salyq saıasaty máselelerin qadaǵalaıtyn bolady. Ol bul qyzmette aǵymdaǵy jyldyń 21 qańtary kúni QR Sport jáne dene shynyqtyrý isteri agenttiginiń tóraǵasy bolyp saılanǵan Erlan Qojaǵapanovty almastyrdy.