Ersaıyn Naǵaspaev qurylys salasynda quqyqtyq retteý nelikten tómendegenin túsindirdi
ASTANA. KAZINFORM – Sońǵy 15 jylda qurylys salasy orta eseppen jylyna jeti paıyz ósim kórsetip otyr. Bul týraly Májilistiń jalpy otyrysynda Qurylys kodeksiniń jobasyn birinshi oqylymda talqylaý kezinde QR Ónerkásip jáne qurylys mınıstri Ersaıyn Naǵaspaev málim etti.
- Qurylys salasy elimizdiń turaqty damýyn qamtamasyz etetin ekonomıkanyń negizgi baǵyttarynyń biri. Ol jalpy ishki ónimniń alty paıyzyn qurap, óndiristik jáne áleýmettik ınfraqurylymdy damytýda sheshýshi ról atqarady. Sońǵy 15 jylda sala orta eseppen jylyna jeti paıyz ósim kórsetip, turaqty damý qarqynyn saqtap otyr. Bul óz kezeginde jańa talaptar men zamanaýı tásilderdi engizýdi qajet etedi. Shırek ǵasyr boıy qoldanysta júrgen zańnama 130-dan astam ret ózgertildi. Sonyń saldarynan quqyqtyq retteýdiń birizdiligi tómendedi. Sondyqtan Memleket basshysynyń tapsyrmasyna sáıkes jańa Qurylys kodeksin qabyldaý bul – ýaqyt talaby. Qurylys kodeksiniń jobasy zaman talabyna saı ázirlenip, salanyń turaqty damýyna negiz bolmaq, - dedi E. Naǵaspaev.
Onyń aıtýynsha, qala qurylysyn retteýde qujattardyń naqty ıerarhııasy qalyptasqan. Olarǵa:
- eldiń aýmaqtyq damýynyń Bas shemasy;
- óńirlerdiń aýmaqtyq jobalaý shemalary;
- qalalardyń Bas jospary;
- jáne naqty jobalaý josparlary kiredi.
- Buryn tek qalanyń Bas jospary ǵana mindetti saraptamadan ótetin. Al naqty josparlar jergilikti deńgeıde ákimniń sheshimimen bekitilip, tekserissiz qabyldanatyn. Sonyń saldarynan qurylys normalary jıi buzylyp, retsiz jáne zańsyz nysandar boı kótergen jaǵdaılar boldy. Osy olqylyqty joıý úshin 2024 jyldan bastap barlyq ázirlenip jatqan nemese túzetiletin qala qurylys jobalary, onyń ishinde naqty jobalaý josparlary arnaıy saraptamadan ótedi. Atalǵan shara sapasyz ári zańǵa qaıshy jobalardy ýaqytyly anyqtaýǵa, jobalaý qateleri men jemqorlyqty boldyrmaýǵa jáne qujattardyń ashyqtyǵyn arttyrýǵa múmkindik beredi. Budan bylaı qurylys qujattaryna sáıkes kelmeıtin nysandardy jobalaý men salýǵa ruqsat berilmeıdi. Sonymen qatar qabyldanǵan sharalar biryńǵaı tsıfrlyq qala qurylysy júıesin qalyptastyrýǵa baǵyttalǵan, - dedi mınıstr.
Onyń sózine qaraǵanda, Kodeks aıasynda qurylys jobalarynyń oryndalýyn qosymsha baqylaý úshin Memlekettik qala qurylysy kadastrynyń avtomattandyrylǵan aqparattyq júıesin engizý kózdelip otyr.
Budan buryn habarlanǵandaı, depýtat Baqytjan Bazarbek jańa Qurylys kodeksiniń jobasynda adam qaýipsizdigi birinshi orynda bolatynyn aıtqan edi.